Ақтау қаласындағы 23-ші шағынауданда орналасқан базар отқа оранып, ондағы 6 дүкен толықтай жанып кетті, деп хабарлайды BAQ.KZ Halyq Uni- не сілтеме жасап.
Маңғыстау облыстық Төтенше жағдайлар департаменті баспасөз қызметінің мәліметінше, 11 қарашада сағат 22:46-да өрт сөндіру және авариялық құтқару жұмыстары диспетчерлік қызметіне 23-ші шағынауданда орналасқан «РУСАЗ» базарының өртенгені туралы хабарлама келіп түскен.
Қазіргі таңда «Балалар әлемі» дүкені, «1000 ұсақ-түйек» кеңсе тауарлары дүкені, сондай-ақ азық-түлік және дәмдеуіштер сататын бутиктер өртенгені анықталды. Өрт сағат 23:23-те сөндірілді, - делінген ведомство ұсынған хабарламада.
Зардап шеккендер жоқ.
Өртті сөндіруге 6 техника және 30 жеке құрам жұмылдырылған. Сондай-ақ жергілікті атқарушы органнан 16 техника мен 81 қызметкер тартылған.
