Ақтау қаласының әкіміне қатысты 50 АЕК мөлшерінде, яғни 172 500 теңге айыппұл салынды. Әкім ақшалай өндіріп алуды 5 күн ішінде төлеуі және сот шешімін 10 күн ішінде орындауы қажет, деп хабарлайды Маңғыстаудағы BAQ.KZ тілшісі.
Қомақты айыппұл заңды күшіне енген сот шешімін уақытылы орындамағаны үшін салынғаны белгілі болды.
Маңғыстау облыстық ауданаралық сотының шешімімен шаһардағы кәсіпкердің Ақтау қаласы әкіміне қатысты талап-арызы қанағаттандырылған. Өйткені жергілікті әкімдік оған жер учаскесінің нысаналы мақсатын өзгертуден бас тартқан екен. Бұл әрекетін сот заңсыз деп таныды. Талапты орындауға 1 ай мерзім белгіленді.
Бірақ осы уақытқа дейін сот шешімі орындалмай, жеткілікті уақыт өтсе де қала әкімі әкімшілік акті қабылдауға ешқандай шара қолданбаған. Әкімшілік кодекстің талаптарына сәйкес, сот шешімдерін орындау соттың бақылауында және оларды орындаудан жалтару ақшалай 50 АЕК өндіріп алуға әкеп соғады,- делінеді Маңғыстау облыстық ауданаралық сотының хабарламасында.
Енді айыппұл уақытылы төленбейтін болса, 10 күнен соң тағы 10 АЕК көлемінде қосымша айыппұл жүреді.
