Ақмола облысының медициналық мекемелерінде 200-ге жуық маман жетіспейді, деп хабарлайды Ақмола облысындағы BAQ.KZ тілшісі.
Өңірде 526 медицина мекемесі жұмыс істейді. Олардың ішінде 113 терапевтік, 106 педиатриялық, 307 жалпы медициналық мекемелер бар.
«Жеті ұйымда кадр тапшылығы байқалады. Степногорск қаласында «Виамедис» ЖШС, Атбасар, Жақсы, Қорғалжын аудандық ауруханаларында және «Авиценна-Бурабай» ЖШС, сондай-ақ Көкшетау темір жол ауруханасында білікті дәрігерлер жетіспейді. Соның салдарынан учаскелік дәрігерлерге жүктеме артуда, – дейді облыстық денсаулық сақтау басқармасының басшысы Нариман Сыздықов.
Атбасар ауданында 45 мыңға жуық адам тұрады. Бұл тұрғындардың барлығы дерлік Атбасар қаласының аудандық ауруханасына жүгінеді. Емхананың дәліздерінде ұзын-сонар кезектер мен халық базасы болған жоқ.
Терапевтке жазылу қиын. Қарт адамдарды Көкшетауға апаруға тура келеді. Себебі ауданда аурухана кезегі қашан келетіні белгісіз. Невропатологқа жазылу да қиын. Бір апта бойы талонға кезек күтесіз немесе ақылы түрде жазыласыз. Медициналық мекемелерде кезек күтетін адамдар көп. Мұның өзі әр түрлі вирустардың таралуына себеп болып отыр, – дейді Атбасар ауданының тұрғындары.
Ауданның бас дәрігері 25 маманның жетіспеушілігін алға тартады. Анестезиологтар мен жалпы практика дәрігерлеріне сұраныс көп. Осыған байланысты бір терапевт кейде 3-4 бөлімде қатар жұмыс істейді. Бұл ұзын-сонар кезектің түзілуіне себеп болып отыр.
Кейбір жағдайларда дәрігер бірнеше бөлімде жалғыз жұмыс істеуге мәжбүр. Жалпы тәжірибелік дәрігер екі салада жұмыс істейді делік. Пандемия жағдайында бұл үлкен жүктеме. Жыл сайын барлық мемлекеттік медициналық университеттермен келіссөздер жүргізіп, мамандар тартуға тырысамыз. Бұл біртіндеп өз нәтижесін көрсетуде. Мамандар тапшылығының тағы бір себебі – елорданың жақындығы болуы да мүмкін. Көптеген жас мамандар үлкен қалаларда жұмыс істегенді жөн көреді, – дейді Атбасар аудандық емханасының бас дәрігері Зарықан Шаубаев.
Шалғай ауылдық елді мекендерде медициналық қызметтердің қолжетімділігі үшін облыс бойынша 11 жылжымалы медициналық кешен іске қосылды.
2021 жылы 205 ауылдық елді мекен медициналық қызметпен қамтылды. Бұл - 54,5 мың адам. Жүргізілген диагностикалық және зертханалық қызметтердің 46,9%-ға, ал бейінді мамандардың консультацияларының 18,5%-ға өсуі байқалады. Тексеру қорытындысы бойынша 5 647 науқас анықталып, оның 198-і есепке алынды, – деп түсіндірді облыстық денсаулық сақтау басқармасының басшысы Нариман Сыздықов.
Жыл сайын Көкшетаудың жоғары оқу орындарына медицина қызметкерлерін оқытуға 50 грант бөлінеді. Жергілікті билік алдағы жылдары дәрігерлердің тапшылығын толығымен жоюға ниетті. Жас мамандарды аудандар мен ауылдық жерлерге тарту үшін жергілікті бюджет есебінен көтерме қаражат, жалға берілетін тұрғын үй және жоғары жалақы бөлу көзделген.
