АҚШ президенті Дональд Трамп пен Украина президенті Владимир Зеленский арасындағы Ақ үйдегі жанжалдан кейін Еуропа көшбасшылары Зеленскийге және Украина халқына қолдау білдірді, деп хабарлайды BAQ.KZ.
Зеленскийдің Ақ үйден мерзімінен бұрын кетуі мен Дональд Трамппен сөзге келуі туралы хабар тараған соң, Еуропа елдері мен ЕО институттарының басшылары Украинаға бір ауыздан қолдау көрсетті. Олар Ресей агрессиясына қарсы күресте Украинаға көмектің жалғасатынын баса айтты.
Польша премьер-министрі Дональд Туск Украина ешқашан жалғыз қалмайтынын мәлімдесе, Франция президенті Эммануэль Макрон украин халқы тек өз еркіндігі үшін ғана емес, бүкіл Еуропаның қауіпсіздігі үшін күресіп жатқанын атап өтті.
Германия канцлері Олаф Шольц Украинаға “әділ әрі тұрақты бейбітшілік” жолында Еуропа мен Германияның қолдауы жалғасатынын жеткізді. Осындай мәлімдемелерді Испания, Норвегия, Швеция, Чехия, Балтық елдері және басқа да мемлекеттердің көшбасшылары жасады.
Еурокомиссия төрайымы Урсула фон дер Ляйен мен Еуропалық кеңес төрағасы Антониу Кошта украин тілінде жариялаған мәлімдемелерінде Еуропа Украинаға әділ әрі тұрақты бейбітшілік үшін қолдау көрсетуді жалғастыратынын мәлімдеді.
Ақ үйдегі жанжал пайдалы қазбалар бойынша келісімнің бұзылуы аясында туындады. Дональд Трамп Зеленскийді “бейбітшілікке дайын емес” деп айыптаған болатын. Дегенмен, еуропалық көшбасшылар бұл риториканы жоққа шығарып, Украина тәуелсіздігін қорғап, бүкіл Еуропаның қауіпсіздігі үшін күресіп жатқанын еске салды.
Еуропаның саяси қолдауы Украина мен АҚШ арасындағы қарым-қатынастағы белгісіздік жағдайында шешуші рөл атқаруы мүмкін.
