Жыл басынан бері елден 7 мың адам көшіп кеткен

Нұр-Сұлтан, BAQ.KZ. 1 мамырға дейінге кезеңге дейін еліміздегі халық саны 19 199,8 мың адам болды, оның ішінде қалалықтар – 11 442,9 мың (59,6%), ауылдықтар – 7 756,9 мың адам (40,4%). 2021 жылғы 1  мамырмен салыстырғанда халық саны 236,9  мың адамға немесе 1,2% өсті.

2022 жылғы қаңтар-сәуірде республика халқының табиғи өсімі 2021 жылғы қаңтар-сәуірмен салыстырғанда  (88 мың адам) 9,8% кеміп, 79,3 мың адам болды. Табиғи өсімнің жалпы коэффициенті 1000 адамға шаққанда 12,54 адам болды. 

АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде,  2022 жылғы қаңтар-сәуірде туғандар саны 127 мың адам, бұл 2021 жылғы қаңтар-сәуірге (137,4 мың адам) қарағанда 7,6% аз. Туудың жалпы коэффициенті 1000 адамға 20,08 туғандарды құрады.

Қарастырылып отырған кезеңде қайтыс болғандар саны 47,7 мың адам, бұл 2021 жылғы қаңтар-сәуірге (49,5 мың адам) қарағанда 3,6% аз. Өлім-жітімнің жалпы коэффициенті 1000 адамға 7,54 қайтыс болғандар.

2022 жылғы қаңтар-сәуірде республикада 1 жасқа дейін шетінеген 1 113 нәресте тіркелді. 2021 жылғы тиісті кезеңмен салыстырғанда (1109 шетінеген нәресте) 0,4% артты. Нәресте өлім-жітімінің коэффициенті 1000 туғанға шаққанда 8,76 оқиға.

Халықтың көші-қоны

Көші-қон қызметі органдары ұсынған мәліметтерді өңдеу нәтижесінде, 2022 жылғы қаңтар-сәуірде елімізге тұрғылықты тұруға келгендердің тіркелу саны 5 122 адам, елімізден кеткендердің саны 7 041 адам, көші-қонның айырымы  -1 919 адам болды. 

Еліміздегі негізгі көші-қон ТМД мемлекеттерімен өтуде. ТМД елдерінен келгендердің және сол елдерге кеткендердің көшіп-қонушылардың жалпы санынан үлесі 85,3% және 80,1%.

 Ел ішінде қоныс аударатын көшіп-қонушылар саны 3%-ға кеміді. Өңіраралық қоныс аудару бойынша халық көші-қонының оң айырымы еліміздің 3 өңірінде байқалды: Алматы (11 577 адам), Нұр-Сұлтан (10 300 адам) және Шымкент (1 664 адам) қалаларында.