Жыл басынан бері 91 мың ата-ана әкімшілік жауапкершілікке тартылды

Бұл туралы Орталық коммуникациялар алыңында өткен брифинг барысында ІІМ Әкімшілік полиция комитетінің төрағасы Қайсар Сұлтанбаев айтты, деп хабарлайды BAQ.KZ тілшісі.

Елімізде осы жылы кәмелетке толмағандарға қатысты жасалған қылмыстардың саны 22%-ға өскен.

Биыл кәмелетке толмағандарға қатысты қылмыстардың өсуіне жол-көлік оқиғалары, жыныстық қылмыстар, бұзақылық және ауырлығы орташа және денсаулығына ауыр зиян келтіру әсер етті. Кәмелетке толмағандардың жыныстық қолсұғылмаушылығына қарсы қылмыстардың жалпы санының 30%-ы ерікті түрде жыныстық қатынасқа түсу нәтижесінде жасалған. Денсаулық сақтау органдарымен салыстырып тексеру барысында полиция 69 қылмысты анықтады. Бұл жасөспірімдердің жыныстық өмірді ерте жастан бастайтындығын көрсетеді, - деді Қайсар Сұлтанбаев.

Сондай-ақ кәмелетке толмағандардың өздері жасаған қылмыстардың саны 60%-ға қысқарған.

Қылмыстардың жасалу себебі ата-аналар тарапынан балалардың мінез-құлқын тиісті бақылаудың болмауы. Статистикаға сәйкес әрбір төртінші қылмысты кәмелетке толмағандар түнде ата-аналарымен бірге үйде болу керек кезде жасайды. Жыл басынан бастап 91 мыңнан астам ата-ана, сондай-ақ 1,6 мыңға жуық кәсіпкер әкімшілік жауапкершілікке тартылды, - деді ҚР ІІМ Әкімшілік полиция комитетінің төрағасы Қайсар Сұлтанбаев.