Журналистің заңды кәсіби қызметіне кедергі жасауға жол берілмейді – министр
Нұр-Сұлтан, BAQ.KZ. Атыраудағы «Дорожный контроль» порталының тілшісі Олеся Вертинскаяны ұрып-соғу оқиғасына қатысты Ақпарат және қоғамдық даму министрі Асқар Омаров пікір білдірді.
Мемлекетіміздің Конституциясының 20-бабы сөз бостандығына кепілдік береді. Әркімнің заң жүзінде тыйым салынбаған кез келген тәсілмен еркін ақпарат алуға және таратуға құқығы бар. Журналистің заңды кәсіби қызметіне кедергі жасауға жол берілмейді!
Құқық қорғау органдары үшін құқық бұзушыны табу және журналист О.Вертинскаяға қатысты шабуыл және қауіп-қатер фактілері бойынша оған тиісті шаралар қабылдау абырой ісіне айналатынына сенімдімін. Ақпарат және қоғамдық даму министрлігі О.Вертинскаяның құқықтары мен бостандықтарына нұқсан келтірудің ашықтығын қамтамасыз ету және оған жол бермеу мақсатында өз құзыреті шегінде оқиғалардың барысын мұқият қадағалайтын болады.
Жалпы, біз журналистерді кәсіби міндеттерін орындау кезінде қорқыту және оларға шабуыл жасау әрекеттерін қолайсыз деп санаймыз.
Әріптесіміз Олесяға тезірек сауығып кетуді тілейміз, - деп жазды министр.