"Жолға ерте қамданыңыз". Сарапшылар мерекеде кептелістің артатынын айтты

Наурыз мейрамы жақындаған сайын қала тұрғындары мейрамға дайындықты күшейтіп, базарлар мен сауда орталықтарына ағылып, қаладан шығып кетуге асығады, деп хабарлайды BAQ.KZ тілшісі.

Бұл – жыл сайын қайталанатын құбылыс. Sergek ITS сарапшылары Астана мен Алматыда жол қозғалысы 20 наурызда күрт өсетінін болжады. Өткен жылғы мәліметтерге сүйенсек, осы күні жолдардағы кептеліс орта есеппен 20-36%-ға артады.

Астанадағы басты кептеліс нүктелері қандай?

Таңертең Бөгенбай батыр, Тілендиев, Тұран даңғылдарында көлік қозғалысы 5-13%-ға баяулаған. Кешке қарай Қабанбай батыр, Қорғалжын тас жолы, Абылай хан сияқты негізгі бағыттардағы жылдамдық 10-15%-ға төмендеген.

Алматыдағы жағдай одан да ауыр

2024 жылы 20 наурызда көлік ағыны ВОАД (солтүстік) бағытында 36%-ға, Әл-Фараби даңғылында 31%-ға артқан.
Қала ішінде көлік қозғалысы біркелкі таралғанымен, жеке көліктегі жолаушыларға көбірек уақыт жұмсауға тура келді.

Шешім қандай?

– Қоғамдық көлікті пайдалану – бұл жеке көлік иелерінің жүйкесін сақтайды, қаладағы қозғалысты жеңілдетеді.
– Жолға қосымша уақыт жоспарлау – мерекелік кештерге, қонаққа баратын болсаңыз, кем дегенде 20% артық уақыт қарастырыңыз.
– Жақын маңдағы демалыс орындарын таңдау – қала ішінде немесе үй маңында мерекені атап өту көлік қозғалысына түсер жүктемені азайтады.