ЖҚЖК аясында 207 мың адам жұмысқа орналастырылды

Нұр-Сұлтан, BAQ.KZ. Жұмыспен қамтудың 2020-2021 жылдарға арналған жол картасы шеңберінде 6,7 мыңнан астам жобаны іске асыру басталды, оларда 130 мың теңгелік орташа жалақымен 207 мың адам жұмыспен қамтылған.

Бұл туралы ҚР Еңбек және халықты әлеуметтік қорғау министрлігінің баспасөз қызметі хабарлады.

ЖҚЖК инфрақұрылымдық жобаларын іске асыру кезінде отандық өндірушілердің кемінде 90%-ының тауарлары мен қызметтерін қолдануды қамтамасыз ету ерекше шарт болып табылады. Жұмысшылардың кемінде жартысын жұмыспен қамту орталықтары арқылы жалдайды, басымдық жұмыссыз жастарға беріледі. Мердігерлер санитарлық-эпидемиологиялық шараларды қолдана отырып, қауіпсіз еңбек жағдайын қамтамасыз етуге тиіс. 

1 қарашадағы жағдай бойынша өңірлерде 6,7 мың жоба бойынша жұмыс басталды, 207 мың жұмыс орны құрылды, оның ішінде халықты жұмыспен қамту орталықтары арқылы 112 мыңнан астам жұмыс орны ашылды.  

Бағдарламаға қатысушылардың жартысы ауыл тұрғындары, 40%-ы – жастар және 7%-ы – табысы аз азаматтар. ЖҚЖК шеңберінде жұмыспен қамтылғандардың ең жоғары үлесі Шығыс Қазақстан (20,5 мың адам немесе 108,8%), Қызылорда (9,4 мың адам немесе 101,2%) және Атырау (7,3 мың адам немесе 102,9%) облыстарында, - делінген хабарламада.

Бұған дейін хабарланғандай, ЖҚЖК аясында барлығы 255 мың жұмыс орнын ашу жоспарлануда. Бұл ретте ЖҚЖК жобалары болашақта 100 мыңнан астам тұрақты жұмыс орнын ашуға негіз болады.