ЖІӨ өсімі: көлік, құрылыс және сауда салалары көш бастады

Ұлттық статистика бюросының алдын ала деректеріне сәйкес, 2025 жылдың қаңтар-шілде айларында елдің жалпы ішкі өнімі былтырғы осы кезеңмен салыстырғанда 6,3%-ға артты, деп хабарлайды BAQ.KZ Экономика министрлігінің баспасөз қызметіне сілтеме жасап.

Тауар өндіру көлемі 8,3%-ға, қызмет көрсету – 5,2%-ға өсті. Ең қарқынды өсім көлік пен сауда салаларында тіркелді. Өнеркәсіп өндірісі 6,9%-ға ұлғайды.

Салалар бойынша ең жоғары өсім:

• Көлік және қойма – +22,5% (жүк тасымалының артуы есебінен)
• Құрылыс – +18,5% (мектептер, жолдар және инфрақұрылым нысандары құрылысы)
• Сауда – +8,6%
• Тау-кен өнеркәсібі – +8,5%
• Өңдеу өнеркәсібі – +6,1% (машина жасау, азық-түлік және мұнай өнімдері өндірісі)
• Ауыл шаруашылығында өндіріс көлемі 3,7%-ға өсті, оның ішінде мал шаруашылығы +3,4%.

Үкімет экономиканы әртараптандыру және инвестициялық белсенділікті ынталандыру арқылы өсімді қамтамасыз етуге бағытталған шараларды жалғастыруда.