"ЖИ – құрал, жауапкершілік адамда": Айна Задабек медиада ЖИ-ді сынақтан өткізудің артықшылығын атады

2025 жылдың сәуір айының басында "Qazcontent" АҚ медиасалада жасанды интеллектіні кеңінен қолдануға бағытталған бір күндік эксперимент жүргізді. Бұл жобада компания құрамындағы ақпарат агенттіктері ЖИ-ді иллюстрациялар жасау және жаңалық мәтіндерін өңдеу үшін қолданды, деп хабарлайды BAQ.KZ.

Эксперимент Президент Қасым-Жомарт Тоқаевтың цифрландыру жөніндегі бастамасын қолдау мақсатында жүзеге асырылды. Мемлекет басшысы Бурабайда өткен Ұлттық құрылтайда ЖИ-ды барлық салаға енгізудің маңызын атап өткен болатын.

Жасанды интеллект медиасапаны арттыруға ықпал етеді. Рутиналық міндеттерді автоматтандыру журналистердің шығармашылыққа көңіл бөлуіне жол ашады, - деді "Qazcontent" төрағасы Айна Задабек.

Компания өкілдерінің айтуынша, ЖИ медиасаланың дамуына серпін беріп, терең талдауға негізделген материалдар жасауға мүмкіндік береді. Жоба тиімділігін көрсетті, енді "Qazcontent" ЖИ-ді өзге де медиажобаларға енгізуді жоспарлап отыр.

Медиа саласында жасанды интеллектінің алатын орны жайлы "Qazcontent" АҚ төрағасы Айна Задабекпен сұхбаттасқан едік.

– Бұл идея қалай пайда болды?

ЖИ-дің дамуын біз сырттай бақылап қана қоймай, оны тәжірибеде қолдануға бел будық. El.kz – цифрлық платформа, сондықтан біз осы мүмкіндікті алғаш болып сынап көргіміз келді. Бүгінгі жоба — соның нақты нәтижесі.

– Бұл жаңалықтарды адам жазған жоқ па сонда?

Жоқ, бүгінгі жаңалықтардың мәтіні, аудармасы толықтай ЖИ арқылы жасалды. Адам тарапынан тек финалдық бақылау ғана болды. Бұл — технологияның нақты мүмкіндігін көрсету үшін жасалған тәжірибе.

– ЖИ қателеспей ме? Қауіп жоқ па?

Қате болуы мүмкін, сондықтан барлық контент редактордың тексеруінен өтеді. ЖИ — құрал, жауапкершілік адамда. Бастысы — біз оны тек көмекші ретінде қолданамыз, адам шығармашылығы мен жауапкершілігі бәрібір басым.

– Бұл журналистерді алмастыра ма?

Жоқ. Журналист – шығармашылық тұлға. ЖИ – тек көмекші. Адамның талдауы, түйсік, кәсіби этикасы – ешқашан ЖИ-мен алмастырылмайды. Бірақ техникалық, уақыт алатын жұмысты ЖИ жеңілдетеді.

– Сіздерден кейін басқа сайттар да қолдана ма?

Иә, біз алғашқы қадамды жасадық. Енді тәжірибемізді бөлісуге дайынбыз. Тіпті басқа редакцияларға арнап ашық тренингтер ұйымдастырамыз.

– Бұл тек жаңалық үшін ме, әлде басқа форматтарда да қолданыла ма?

Келешекте ЖИ бейнематериалға мәтін жазу, аудионы мәтінге айналдыру, инфографика жасау сияқты көптеген жанрда қолданылады. Біз соған дайындалып жатырмыз.

– Президент Тоқаев ЖИ туралы айтқан болатын. Осы бастамаларыңыз соған байланысты ма?

Иә. Президент бірнеше рет ЖИ-ді барлық салаға енгізу керектігін атап өтті. Біз ақпараттық саясатқа жауапты орган ретінде медиа саласындағы нақты қадамды осы жобамен бастадық.

– Журналистерге тренинг өткізу қашан басталады?

Осы көктемде басталады. Алдымен Еl.kz редакциясы ішкі оқудан өтеді. Кейін мемлекеттік және жеке БАҚ өкілдеріне арналған ашық практикумдар ұйымдастырылады.