Жетісу облысында қар құрсауында қалған 4 адам құтқарылды

Жетісу облысы Алакөл ауданында Көктұма станциясынан шамамен 10 шақырым жерде жеңіл автокөлік қар құрсауында қалып қойды. Көлікте 4 ересек адам болған, деп хабарлайды BAQ.KZ ТЖМ баспасөз қызметіне сілтеме жасап.

ТЖМ құтқарушылары жедел жетіп, жолаушыларды қауіпсіз жерге – Көктұма ауылына эвакуациялады. Зардап шеккендер жоқ, медициналық көмек қажет болмады.

ТЖМ қолайсыз ауа райында жолға шықпауға, сапар алдында ауа райы мен жол жағдайын тексеруге және байланыс құралдарын дайындап жүруге шақырады.