Жер телімдерін әкімдіктер келісе отырып бөледі

ҚР Премьер-министрі Әлихан Смайылов Инвестициялық штабтың отырысын өткізді, деп хабарлайды BAQ.KZ Үкіметтің ресми сайтына сілтеме жасап.

Оның барысында инвестициялық келісімшарттар бойынша мемлекеттік заттық гранттар түрінде жер телімдерін беру мәселелері қаралды.

Отырыста сыртқы істер министрінің орынбасары Алмас Айдаров мемлекеттік заттық гранттар Қызметтің басым түрлерінің тізбесі бойынша тауарларды өндіру саласында да, қызмет көрсету саласында да берілетінін және сауда-саттық (аукциондарды) жүргізуді талап етпейтін ерекше жағдайларға жататынын айтты.

Заттық гранттарды әкімдіктер Ауыл шаруашылығы министрлігінің Жер ресурстарын басқару комитетімен келісе отырып бөледі.

2005 жылдан бастап 2023 жылдың маусымына дейін ҚР Сыртқы істер министрлігінің Инвестиция комитеті 1438 инвестициялық келісімшартқа қол қойды, оның 216-сы бойынша заттық гранттар түрінде жер берілген және 37 мыңнан астам жұмыс орны құрылған.

Осы келісімшарттар шеңберінде 2,2 трлн теңге сомасына инвестициялар тартылды, оның ішінде қызмет көрсету саласында (қойма орындары, білім беру, денсаулық сақтау, қонақ үй қызметтері, жолаушылар тасымалы саласындағы нысандардың құрылысы) 125 келісімшарт жасалды.

Премьер-министр отырысты қорытындылай отырып, Мемлекет басшысы Қасым-Жомарт Тоқаевтың инвестиция тарту мен бизнесті қолдауға ерекше көңіл бөліп отырғанын атап өтті. Үкімет те осы бағыттар бойынша белсенді жұмыс жүргізіп келеді.

Осыған орай, Әлихан Смайылов жауапты мемлекеттік органдарға заттық гранттар түрінде жер телімдерін берудегі құқық қолдану тәжірибесін жетілдіру мақсатында нормативтік құқықтық актілерді өзектендіруді тапсырды.