«Жайлы мектеп»: Атырау облысында алғашқы екі мектеп ашылды

Атырауда «Жайлы мектеп» ұлттық жобасы аясында салынған екі мектеп пайдалануға берілді. Алмалы ауылдық округі Береке ауылында 1200 орындық №47 орта мектеп, Сарыөзек ықшамауданында 300 орындық №46 орта мектеп ашылды, деп хабарлайды BAQ.KZ.

Облыс әкімінің баспасөз қызметінің мәліметі жазғандай, білім ордаларының ашылу салтанатына облыс әкімі Серік Шәпкенов қатысып, тұрғындарды жаңа мектептердің ашылуымен құттықтады.

Мемлекет басшысы Қасым-Жомарт Кемелұлы Тоқаев орта білімнің сапасы табысты ұлт болудың тағы бір маңызды шарты екенін айтып, әр оқушының сапалы білім алуына, жан-жақты дамуына қолайлы жағдай жасауды тапсырды. Бүгін есігін ашатын білім ордасында шәкірттердің барлық пәнді оқып-үйренуіне, ұстаздардың шығармашылықпен айналысуына толық жағдай жасалды. Бұл мектепте мұғалім мен оқушының, мектеп пен ата-ананың байланысы артып, білімді де талантты, санасы сергек, ойы ұшқыр, бәсекеге қабілетті жас ұрпақ тәрбиеленіп шығарына сенім мол, - деді С.Шәпкенов.

Жаңа мектептерде екі ауысымда оқитын 3000 балаға 120-дан астам ұстаз білім береді.

Мектептерге Жедел басқару орталығына қосылған бейнебақылау камералары орнатылып, ерекше білім беруді қажет ететін балалар үшін кедергісіз орта қалыптастырылды. Бастауыш және жоғары сынып оқушылары үшін бөлек блоктар салынған.

Мектеп аумағы 2 жүгіру жолағымен, баскетбол, волейбол алаңдарымен, теннис кортымен, ойын және workout алаңдарымен жабдықталған.

Мектеп ғимаратында 2 спорт зал, бастауыш және жоғары сынып оқушыларына арналған екі асхана, 260 орындық акт зал және кітапхана бар.
Сонымен қатар психолог, логопед, медициналық кабинеттерімен, заманауи үлгідегі оқу сыныптарымен, физика, химия зертханаларымен және STEM кабинеттерімен жарақталған.

«Жайлы мектеп» ұлттық жобасы аясында осы жылдың соңына дейін тағы үш мектеп пайдалануға беріледі.

2025 жылдың аяғында жайлы мектептердің саны 12-ге жетіп, 12 мыңнан астам оқушы сабаққа барады.