Жастар саясаты туралы: ауыл жастары басты назарда болуы тиіс - министр

Ақпарат және қоғамдық даму министрі Дархан Қыдырәлі жастар саясаты туралы заң жобасында қандай жаңашылдықтар бар екенін айтты, деп хабарлайды BAQ.KZ тілшісі.

Мемлекет Басшысы қоғамның саяси және экономикалық трансформациясы, сондай-ақ, табысты және әділ Қазақстан құру бағытында ауқымды міндеттер қойып отыр. Бұл процестердегі жастардың орны айрықша. Өйткені, ел халқының 20 пайызынан астамы - жастар. Біз жастардың дамуына жол ашып, өмірден, қоғамнан өз орнын табуына мүмкіндік беруге, жағдай жасауымыз керек, - деді Дархан Қыдырәлі.

Ол бұл заң жобасының осы бағыттағы мемлекеттік маңызы бар құжаттың бірі екенін атап өтті. 

Сол себепті жастарымыздың білім алуы, жұмысқа орналасуы, денсаулығы, өзін-өзі дамытуы, еліміздің әлеуметтік-экономикалық және қоғамдық-саяси өміріне толыққанды қатысуы үшін тең мүмкіндік пен қолайлы жағдай жасау - кезек күттірмейтін көкейкесті мәселе. Әсіресе, ауыл жастары мен әлеуметтік жағдайы төмен жастар басты назарда болуы тиіс, - деді Ақпарат министрі Мәжілістің жалпы отырысында.

Сондай-ақ министрдің сөзінше, жаңа өндіріс орындары мен жаңа жұмыс орындарын ашып жатқан белсенді әрі бастамашыл жастарды, жас кәсіпкерлерді қолдау да - күн тәртібіндегі маңызды іс.