Жастар менторлық оқыту бағдарламасынан өтіп жатыр

Алматы облысы, Талғар ауданы, «Ақ Бұлақ» демалыс орнында «ӨзгерIS» - жастарды менторлық оқыту бағдарламасы басталды, деп хабарлайды BAQ.KZ.

Шара 25 қазан – Республика күніне орай, ҚР Мәдениет және ақпарат министрлігі, «Азаматтық бастамаларды қолдау орталығы» КЕАҚ қолдауымен, «Алматы студенттер Альянсы» ұйымының ұйымдастыруымен «Ules» жобасы аясында жүзеге асырылып жатыр.

Менторлық оқыту бағдарламасында жастар тұлғалық даму, кәсіпкерлік, қаржылық сауаттылық, кәсіби бағдар беру (профориентация), медиа бағыттары бойынша білімдерін шыңдайды және ары қарай игерген білімдерімен өз өңірлеріндегі жастармен бөліседі.

«ӨзгерIS» менторлық оқыту бағдарламасына республиканың түкпір-түкпірінен 100 жас қатысуда.

Шарада мемлекет және қоғам қайраткерлері, инфлюенсерлер мен түрлі сала мамандары жастармен кездесіп дәріс оқиды. Сонымен қатар жастар спорттық, шығармашылық бағытта жарысады. Шара соңында қатысушыларға оқыған бағыты бойынша арнайы сертификаттар табысталады.

Алматы студенттер Альянсы» КҚ директорының айтуынша – бағдарламаға қатысуға 200-ден астам өтінім келіп түскен. Толтырылған сауалнама мен мотивациялық хаттардың негізінде 100 жас іріктеліп алынды. Қатысушылардың арасында студенттер, ұстаздар, кәсіпкерлер және түрлі сала мамандары бар.