Жаңбыр мен найзағай: Демалыста қай өңірлерде күн райы бұзылады?

4-6 сәуірге арналған Қазақстан бойынша ауа райы болжамы жарияланды. Синоптиктердің мәліметінше, алдағы күндері еліміздің басым бөлігінде жауын-шашын күтіледі, деп хабарлайды BAQ.KZ.

«Қазгидромет» мамандарының болжамынша, барикалық циклондар мен антициклондардың тез алмасуына байланысты жайлы ауа райы жауын-шашынды күндерге ұласады. Республика аумағында жаңбыр жауып, кей жерлерде найзағай ойнайды деп күтілуде.

Қатты жаңбыр мен дауыл

Кейбір аймақтарда жауын-шашын мөлшері нормадан жоғары болуы мүмкін:

• 4 сәуірде: Елдің солтүстік-батысында;

• 5-6 сәуірде: Батыс аймақтарда;

• 5 сәуірде: Оңтүстік облыстарда кей уақыттарда қатты жаңбыр жауады.

Сонымен қатар, Қазақстан аумағында жел күшейіп, күндіз кей өңірлерде бұршақ пен дауыл болуы мүмкін. Түнгі және таңғы уақытта тұман түседі.

Температура қалай өзгереді?

Күндізгі ауа температурасы аймақтарға байланысты әртүрлі құбылады:

• Батыста: Күн суытады. Температура 15–25 градустан 10–20 градус жылыға дейін төмендейді.

• Солтүстікте: Керісінше, жылынады. Сынап бағанасы 11–20 градустан 15–20 градусқа дейін көтеріледі.

• Шығыста: Жарқыраған күн мен жылы ауа райы сақталады. Ауа температурасы 15–23 градустан 20–28 градусқа дейін ауытқиды.

Елдің қалған аумақтарында ауа райында айтарлықтай өзгерістер күтілмейді.

Еске салайық, бұған дейін сәуір айында ауа райы қандай болатыны айтылды.