Жаңа оқу жылының әсері: Алматы автобустарында жолаушылар саны артты

Қыркүйек басталғалы Алматы көшелеріндегі қарбалас қайта күшейді. Таңертең жұмыс пен оқуға асыққан жұрт, кешке үйіне қайтқан тұрғындар қоғамдық көліктерде адам қарасын көбейтті. BAQ.KZ тілшісі қаладағы таңғы және кешкі қарбаластың қалай өтіп жатқанын көру үшін Алматының адам көп жүретін көшелерін аралап шықтық.

Айта кетейік, қаладағы қоғамдық көлікке қатысты жағдайды өз көзімізбен көріп қайтуға алматылық тұрғынның жазбасы себеп болды. Ол таңғы сағат 7:10-да Шұғыла ықшамауданынан Б.Момышұлы метро станциясы бағытына қатынайтын барлық автобустар лық толы екенін жазған еді.

Автобустардың 3-5 минуттық аралығы жолаушылар ағынын игеруге жеткіліксіз. Кейін Б.Момышұлы метро станциясының өзінде де 3 минуттық интервал жағдайды жеңілдете алмай отыр. Алматы қаласының әкімдігі жаңа қасбеттер мен жаяу жүргіншілер аймақтарын жасағаны жақсы, бірақ көлік және қоғамдық көлік инфрақұрылымына да назар аударсаңыздар екен, - деген еді алматылық тұрғын. 

Расында, таңғы уақытта аялдамаларда автобус күткен адамдардың қарасы қалың болды.

Кейбір бағыттарда жолаушылар автобус келген бойда ішке сыйысуға тырысып, есік алдында кезек пайда болды.

Автобустардың ішінде бос орын табу қиын, ал көп жағдайда жолаушылар жолды түрегеп тұрып өткізеді.

Әсіресе қала орталығына қарай қатынайтын бағыттарда жүктеме айтарлықтай жоғары.

Кешкі уақытта да жағдай айтарлықтай өзгермейді.

Жұмыстан және оқу орындарынан қайтқан тұрғындар қоғамдық көліктерге лық толады.

Кей аялдамаларда алғашқы келген автобусқа сыймаған жолаушылар келесі рейсті күтуге мәжбүр болады. Қарбалас сәттерде автобустардың есік маңында адам көп жиналады.

Метроның кіреберістері мен эскалаторлары маңында да адам қарасы қалың болып, жолаушылар легі бір сәтке де саябырсыған жоқ.

Жалпы метро станцияларында жолаушылар саны артқаны байқалады.

Таңертең платформаларда пойыз күткен адамдар легі үзілмейді. Вагондарда бос орын сирек кездеседі, ал кей жолаушылар бірнеше станция бойы түрегеп жүреді. Кешкі уақытта метроға түсетіндердің қарасы одан әрі көбейеді.

Қала тұрғындарының бір бөлігі жеке көліктен гөрі қоғамдық көлікті таңдағанымен, жолаушылар ағынының көбеюі автобустар мен метроға түсетін салмақты арттырған.

Әсіресе қыркүйек айында студенттер мен оқушылардың қалаға оралуы бұл үрдісті айқын көрсетті.

Дегенмен таңғы және кешкі қарбалас кезінде Алматының қоғамдық көлік жүйесі әдеттегіден әлдеқайда қарқынды жұмыс істеп жатыр.

Осылайша қыркүйек айындағы дәстүрлі қарбалас Алматының қоғамдық көлік жүйесіне түсетін жүктеменің айтарлықтай артқанын тағы бір мәрте көрсетті.