Жамбылда 5 адамнан тұратын қылмыстық топ ұсталды

ҰҚК Жамбыл облысы бойынша департаменті мен өңір прокуратурасының бірлескен жұмысының нәтижесінде аса ірі мөлшерде есірткі затын тәркіледі, деп хабарлайды BAQ.KZ.

Бас прокуратураның мәліметінше, ұсталған бес адамнан тұратын қылмыстық топ 34 кг 123 гр «мефедрон» синтетикалық есірткісін сату мақсатында заңсыз дайындап, сақтаған.

Қылмыстық топ 2-3 айдың көлемінде Байзақ ауданының аумағында жасанды лабораториялық цехта синтетикалық есірткі затын дайындап, кейіннен тасымалдау жолымен республиканың өзге қалаларына өткізу мақсатында жұмыс істеген. Олар қылмыстық әрекеттерін жүзеге асыруда жоғары деңгейдегі сақтық шараларын қолданып, Тараз қаласындағы жалдамалы пәтерде іс-қимылдарын алдын ала жоспарлап, есірткіні дайындауға арналған мекенжайды бейнебақылау арқылы қашықтан бақылап отырған, – деп жазды ведомстводан.

Департаменттің қызметкерлері қылмыстық топты есірткіні дайындау сәтінде ұстап, прокуратураның қолдауымен күдіктілердің барлығы сотпен қамауға алынды. Құқық бұзушылардың әрекеттері ҚК-тің 297-бабы 3-бөлігі 1, 3-тармақтарымен сараланып, сотқа дейінгі тергеп-тексеру жүргізілуде. Аталған синтетикалық есірткі заты тәуелділік тудыратын әртүрлі химиялық қоспалардан дайындалады, адам өміріне аса қауіпті.