Жамбыл облысында анасы мен баласы індеттен айықты

Нұр-Сұлтан, BAQ.KZ. Жамбыл облысының үш тұрғыны коронавирустан емделіп шықты. Бұл туралы Мемлекеттік комиссияның шұғыл штабы мәлімдеді.

17 сәуір күні Жамбыл облысының үш тұрғыны коронавирус инфекциясынан жазылып, үйлеріне шығарылды. Олардың екеуі — анасы мен ұлы, 1950 және 1979 жылғы Тараз қаласының тұрғындары. Екеуі де 2 сәуірде ауруханаға жатқызылды. Үшіншісі — 1991 жылғы Жамбыл ауданының тұрғыны. Ауыр жүк тасымалдаушы болып жұмыс істейтін ол Ресейге жүк тасып, Алматы арқылы қайтып оралған. Ол да 2 сәуір күні ауруханаға жатқызылды - делінген хабарламада.

Олар екі апта бойы инфекциялық стационарда болып, ем шараларын қабылдады. Алгоритмге сәйкес, олардан коронавирус инфекциясына екі рет зертханалық талдаулар алынып, қорытындысында аурудан айыққаны расталды.

Алдағы екі апта бойы олар жергілікті емхананың учаскелік дәрігерінің бақылауымен үй карантинінде болады.

Бүгінгі таңда инфекциялық стационарда 44 науқас ем алып жатыр. Науқастардың жағдайы қалыпты, олар қажетті ем шараларын алып жатыр.

Жалпы бұл өңірде коронавирустан 6 адам сауығып шықты.