Жалға берілетін үйді бергені үшін пара алған әкімдік қызметкері ұсталды

Нұр-Сұлтан, BAQ.KZ тілшісі. AntikorNews алаңында өткен тікелей эфирде Сыбайлас жемқорлыққа қарсы іс-қимыл агенттігінің аса маңызды істер жөніндегі тергеушісі Данияр Бекайдаров СҚО-да 29 жасқа дейінгі еңбек жастарына жалға берілетін тұрғын үй бергені үшін жүйелі түрде пара алған лауазымды тұлға ұсталғанын айтты.

Солтүстік Қазақстан облысы бойынша Сыбайлас жемқорлыққа қарсы қызмет Петропавл қаласы әкімдігінің халықты жұмыспен қамту орталығының лауазымды адамының орталықтың балансындағы коммуналдық тұрғын үй қорынан мұқтаж адамдарға, атап айтқанда 29 жасқа дейінгі еңбек жастарына жалға берілетін тұрғын үй бергені үшін жүйелі түрде пара алды деп күдік келтірілген қылмыстық әрекетінің жолын кесті, - деді тергеуші.

Бекайдаров баяндағандай, ол үшін мемлекетпен 2017-2021 жылдарға арналған «Еңбек» нәтижелі жұмыспен қамтуды және жаппай кәсіпкерлікті дамыту бағдарламасы қарастырылған. Ол жас жұмыс істейтін отбасыларды 5 жылға дейін уақытша тегін баспанамен қамтамасыз етуге бағытталған.

Лауазымды тұлға өзіне жүктелген орындау мен көрсетілген мемлекеттік бағдарламаны іске асыруды пайдалана отырып, тұрғын үйге мұқтаж тұлғалар санатын іздестіруде және олардан пәтер бергені үшін ақша қаражатын алуда рөл берілген өзінің сенімді тұлғалары арқылы әрекет етті. Пара сомасы бөлінетін тұрғын үйдің квадратурасына байланысты 550 мыңнан 800 мың теңгеге дейін өзгеріп отырған, - деп айтты Бекайдаров.

Лауазымды тұлға мен оның сыбайластарына қатысты 2 ай мерзімге күзетпен ұстау түріндегі бұлтартпау шарасы санкцияланды.

Айта кетейік, сотқа дейінгі тергеп-тексерудің егжей-тегжейлері тергеу мүддесінде жария етілмейді. Күдіктілерге қатысты олардың кінәсінің дәрежесін анықтай отырып, түпкілікті шешімді сот шығарады.