Жаңа жылдық қайырымдылық шыршасы өтті

Нұр-Сұлтан, BAQ.KZ. Достық үйінде Нұр-Сұлтан қаласы Қазақстан халқы Ассамблеясының жаңа жылдық қайырымдылық шыршасы өтті, деп хабарлады елорда әкімдігінің жанындағы "Қоғамдық келісім" КММ баспасөз қызметі.

Жаңа жылдық қайырымдылық шыршасының негізгі мақсаты – аз қамтылған және көпбалалы отбасылардан шыққан, жетім балалар мен ата-анасының қамқорлығынсыз қалған және мүгедек балаларға көмек көрсету, сондай-ақ оларға мерекелік көңіл-күй сыйлау.

Достық үйінің концерттік залында өткен шараға 100-ге жуық бала мен ата-ана қатысты. Олардың арасында танымал продюсер Алпамыс Шәрімов, жайдарманшы Ғалым Махамбетов пен ұлы Расул да болды. Аяз ата мен Ақшақар, Микки Маус пен Гринч, Миньон және Темір адам бейнесіндегі ертегі кейіпкерлері қойылымдар қойып, бүлдіршіндерді ерекше әсерде қалдырды. Арнайы ойындар мен концерттік бағдарлама да ұйымдастырылды, - делінген хабарламада.

Мереке соңында әр балаға жаңа жылдық сыйлықтар табысталды. Өңірлік этномәдени бірлестік өкілдері де балаларды Жаңа жыл мерекесімен құттықтап, игі лебіздерін білдірді

Айта кетейік, қайырымдылық шыршасы "ОСК Стройсервис" ЖШС бас директоры, елордалық "Юнчи" дүнген этномәдени орталығы төрағасының орынбасары Даут Генхузовтың мұрындық болуымен атап өтілді.