«Жұлдыз» индустриалды аймағында 8 мың жұмыс орны ашылады – Шымкент

Нұр-Сұлтан, BAQ.KZ. Президенттің өңдеу өнеркәсібін дамыту жөніндегі  тапсырмасына сәйкес, Шымкент қаласында жалпы аумағы 306 гектарды құрайтын «Жұлдыз» индустриалды аймағы құрылып жатыр. Бұл туралы қала әкімінің баспасөз қызметі хабарлады.

Бүгінгі таңда индустриалды аймақтың техникалық-экономикалық негіздемесі әзірлену үстінде. Бірінші кезеңде 2020-2021 жылдары аралығында 110 гектар, екінші кезеңде  2021-2022 жылдары 230 гектар жер игеріледі.  

Жалпы, бұл индустриалды аймаққа 105 млрд теңге көлемінде инвестиция тартылады. Ол толық іске қосылғанда 8 000 адам жұмыспен қамтылмақ. 

Сондай-ақ, мұнда кезең-кезеңімен 60 жоба жүзеге асырылады деп күтілуде. Жобалар негізінен құрылыс материалдары, металлургия, фармацевтика және жиһаз өнеркәсібіне бағытталған. Атап айтқанда, индустриялды аймақта трансформатор, полиэтилен құбыры, жылытқыштар, пенопласт, пеноплекс өндіретін өндіріс компаниялары орналасады деп жоспарланып отыр.