Зейнетақыны қайта есептеу кезінде біз жұмыста түнедік. Ағыбаева ағынан жарылды

Нұр-Сұлтан, BAQ.KZ тілшісі. Әлеуметтік салада 25 жылдан астам жұмыс істеп келе жатқан қызметкер, «Азаматтарға арналған үкімет» корпорациясының ШҚО бойынша филиалының әлеуметтік төлемдер мониторингі басшысы Айжан Ағыбаева бұл саланың қыр-сыры мен осы уақыт аралығында қандай реформалар жасалғанын бізге берген сұхбатында айтып берді.

Айжан Ағыбаева Шығыс Қазақстан облысы Зайсан ауданы Қарабұлақ ауылында дүниеге келген.

Мен әлеуметтік саладағы еңбек жолымды 19 жасымда Өскемен қаласының Октябрь аудандық бөлімінде бастадым. 25 жыл бойы қазақстандықтардың игілігі үшін қызмет етіп келемін. Қазір «Азаматтарға арналған үкімет» мемлекеттік корпорациясында жұмыс істеймін. Осыған дейін Октябрь ауданының халықты әлеуметтік қорғау басқармасында жұмыс істедім. Мүгедектермен, зейнеткерлермен, жетім балалармен және қоғамның осал топтарының басқа да өкілдерімен күнделікті өзара іс-қимыл жасау оңай емес, - деді ол. 

Оның айтуынша, олар жыл сайын тек өңірде ғана емес, республикада да көшбасшы орынға ие болған. 

Біз Қазақстанда бірінші болып зейнетақылар мен басқа да әлеуметтік төлемдерді есептеу үшін компьютерлік техниканы белсенді пайдалана бастадық. Мен ақпараттандыру бөлімінде жұмыс істедім және IBM, PENTIUM алғашқы компьютерлерінде жұмыс істеу дағдыларын алғашқылардың бірі болып үйрендім. Сол кезде біздің аты аңызға айналған бағдарламашылар жасаған бағдарламалық жасақтама, осы уақытқа дейін қолданылған бағдарламаның негізін қалады, бірқатар маңызды операцияны автоматтандыруға және қағазбастылықтан, қол еңбегінен, ең бастысы қателік жасаудан арылуға мүмкіндік берді. Аудандық бөлімдегі жергілікті желі қаладағы ноу-хау болды, - деді Ағыбаева. 

Әлеуметтік қызметкер атап өткендей, зейнетақы заңнамасына енгізілген барлық өзгерісті база мен бағдарламаға енгізіп, әрқашан бір қадам алда болған. 

Егер біздің республикамыз үш зейнетақы реформасын бастан өткергенін ескерсек, көп нәрсе жасалды. Ал 2003 жылы зейнетақыны қайта есептеу кезінде біз жұмыста түнедік. Бұл ұмытылмайтын уақыт еді. Біз бір үлкен тату отбасы сияқты едік. Мен әлі күнге дейін жылулықпен және күлімсіреп, сол уақытты еске аламын. Одан әрі 1997 жылы Үкімет қаулысымен зейнетақы төлеу жөніндегі мемлекеттік орталық құрылды. Ол халыққа әлеуметтік төлемдерді есепке алу және жүзеге асыру жүйесіндегі негізгі оператор, - деді ол.

 

Ағыбаеваның айтуынша, бастапқыда зейнетақы реформасын жүзеге асыру мақсатында құрылған ЗТМО республиканың әлеуметтік және қаржы жүйесінде көптеген мемлекеттік маңызды қызметін атқарды. 

Президент Қазақстан халқына Жолдауында экономиканы нығайту мен азаматтардың әл-ауқатын арттырудың негізгі міндеттерін айқындай отырып, халыққа көрсетілетін мемлекеттік қызметтердің сапасын арттыруды негізгі басымдықтардың бірі ретінде атап көрсетеді. ЗТМО жұмысы Президент Жолдауының ережелеріне, Үкімет шешімдеріне сәйкес әлеуметтік төлемдерді ұйымдастыруға және уақтылы қамтамасыз етуге мүмкіндік берді. Біз осы жылдар бойы көп өзгердік және жақсы жаққа өзгердік. Зейнетақы жүйелерін әкімшілендіруге түбегейлі жаңа тәсілдер құрылды, ақпараттық-технологиялық даму, материалдық-техникалық база түбегейлі өзгерді, - деді ол.

 

Айжан Ағыбаева зейнетақы төлеу жөніндегі мемлекеттік орталықта операциялық бөлімнің маманынан бастап директордың орынбасарына дейінгі жолдан өткенін жеткізді. 

2012 жылы мен «Әлеуметтік еңбек саласының үздігі» төсбелгісімен марапатталдым. Содан кейін 2016 жылдың сәуірінде төрт ұйымды – жер кадастрын, жылжымайтын мүлік орталығын, зейнетақы төлеу жөніндегі мемлекеттік орталықты және халыққа қызмет көрсету орталығын біріктіру арқылы «Азаматтарға арналған үкімет» мемлекеттік корпорациясы» коммерциялық емес акционерлік қоғамы пайда болды. Біздің дирекцияда бэк-офис функциялары қалды. Біз зейнетақы, мемлекеттік жәрдемақы және әлеуметтік төлемдер төлеуді ұйымдастырумен айналыстық. Мұнда БЭК-офисте қызмет көрсетушінің зейнетақы және әлеуметтік төлемдерді тағайындауы үшін істердің электрондық макеттері мен шешімдер жобалары қалыптастырылады. Жалпы мемлекеттік корпорация төлемдердің 43 түрі бойынша құжаттарды қабылдау мен өңдеуді жүзеге асырады, - деді маман.

 

Оның айтуынша, бүгінгі таңда зейнетақы мен жәрдемақы тағайындау бойынша қызмет көрсету процесі толықтай дерлік автоматтандырылған. 

Қазақстандықтарға барлық құжат пакетін ұсынудың қажеті жоқ, қажетті ақпарат уәкілетті органдардың деректер базасынан жиналады. Ол үнемі жетілдіріліп, жаңартылып, толықтырылып отырады. Бұдан басқа біз мемлекеттік органдардың автоматтандырылған орталықтандырылған дерекқорларын өзектендіруді және бюджет қаражатының артық төлемдерін болдырмау үшін төлем алушылардың дербестендірілген есебін үнемі жүргіземіз, - деді ол.

 

Қазір ол филиалдың әлеуметтік төлемдер мониторингі басқармасын басқарады. 

Менің басқармамның негізгі міндеті – РБ-тен зейнетақылар мен жәрдемақылар мен әлеуметтік төлемдерді төлеуге және мемлекеттік әлеуметтік сақтандыру қорынан төленетін әлеуметтік төлемдерді төлеуге бөлінген қаражаттың дұрыс пайдаланылуына бақылауды жүзеге асыру және зейнетақылар, жәрдемақылар мен барлық әлеуметтік төлемді төлеуге тексерулер жүргізу, - деді Ағыбаева.

 

Сонымен қатар ол «Азаматтарға арналған үкімет» мемлекеттік корпорациясы» коммерциялық емес акционерлік қоғамының Шығыс Қазақстан облысы бойынша филиалының кәсіподақ комитетінің төрайымы екен. 

2021 жылғы 1 наурызда «Азаматтарға арналған үкіметтің» кадр резервіне іріктеу басталды, мен Мемлекеттік корпорацияның республикалық таланттар пулынан өткен 353 адамның қатарына кірдім. Әлеуметтік сала өзіне баса назар аударуды талап етеді, осы саладағы еңбек оңай емес және біліксіздік пен дөрекілікке жол бермейді. Менің ойымша, бұл салада ашық жүрегі бар адамдар ғана жұмыс істей алады, - деп түйіндеді ол.