Қызылорда облысында шетелден ірі қара мал сатып алу жоспарлануда

Нұр-Сұлтан, BAQ.KZ. Мемлекеттік «Сыбаға» бағдарламасы аясында 2019 жылы Арал ауданына 350 бас мүйізді ірі қара малын шет елден сатып алу жоспары берілді. Бұл туралы kyzylorda-news.kz сайтында хабарланды.

Қазіргі кезде «Жомарт» шаруа қожалығының басшысы Қазыбек Әлібеков Ресей Федерациясына барып өзіне және «Әулие төбе» шаруа қожалығына алатын малын көріп, 2019 жылдың қазан айында әкелетін болып келісілді. Жоғарыда аталған екі шаруа қожалығы «Ауыл шаруашылығын қаржылай қолдау қоры» АҚ-ның Қызылорда филиалына барып, кездесіп, мал алуға несиені тамыз айында құжатын тапсыруды жоспарлаған. Мұнан бөлек, биыл ауданға 7800 бас қой сатып алу жоспары берілсе, бүгінгі күнге дейін 1769 бас қой алуға несие алу үшін шаруашылықтар құжатын тапсырып, қойылатын кепілдерін заңдастыруда.

Тұқымдық түрлендіру жұмыстары да қарқынды. 2019 жылға 7180 бас мүйізді ірі қара малы аналықтарын тұқымдық түр¬лендіруге қатыстыру жоспары берілсе, 1449 бас аналық сиыр және 90 бас асыл тұқымды бұқа тұқымдық түрлендіруге қатысуда.

Айта кетейік, аудан бойынша ауыл шаруашылығы өнімдерінің жалпы көрсеткіші 102,4 процентке орындалған. 2019 жылдың 1 шілдесіндегі есепке сәйкес аудандағы барлық ауыл шаруашылығы құрылымындағы түлік саны–мүйізді ірі қара 55516 басқа, қой мен ешкі 101114-ке және жылқы 37064-ке, түйе 30854 басқа жетіп отыр.