Қызылорда облысында күріш өңдейтін зауыт ашылды

Нұр-Сұлтан, BAQ.KZ. Қызылорда облысының әкімі Қуанышбек Ысқақов «Абай Дәулет» серіктестігінің күріш ақтау зауытының ашылу салтанатына қатысты, деп хабарлады облыстық әкімдіктің ресми сайтында.

Сағатына 7 тоннадан астам өнім өндіретін зауыт 80 адамды тұрақты жұмыспен қамтып отыр.

«Абай Дәулет» серіктестігінің негізгі қызметі - күріш жармасын өңдеу мен оны сатуды ұйымдастыру. Одан әрі зауыттың жұмысын кеңейту бағытында бүгінде өз инвестициясына жаңа технологиямен жабдықталған құрал- жабдықтар орнатқан.

Жаңа зауыттың ерекшелігі – күрішті ақтаумен қатар, мал шаруашылығында жемдік мақсатында пайдаланылатын күріш қауызын ұнтақтап, қалдықсыз өнім шығаруға бейімделген.

«Мемлекеттік қолдаудың арқасында соңғы жылдары аймақ дихандары күріштен тұрақты жоғары өнім алып, еліміздің астық қорының ұлғаюына өз үлестерін қосып келеді. Биылғы жылы облыс бойынша 88 мың гектар күріш егіліп, күтімге алынған болатын. Қазіргі таңда барлық аудандарда Сыр маржанын жинау науқаны қызу жүруде»,- деді Қуанышбек Досмайылұлы.

«Абай Дәулет» серіктестігі күрішті сапалы өндеп, өнімін ішкі нарыққа да, алыс-жақын шетелге өткізуде де тәжірибесі бар ірі компания. Оның өнімдері сапа менеджменті талаптарына толық сәйкес келеді. Оған дәлел бүгінде күрішті Ресей, Өзбекстан, Моңғолия, Украина және Тәжікстан елдеріне экспорттап отыр.

Аймақ басшысы облыстың күріш шаруашылығы саласы тағы бір заманауи өндіріс ошағымен толығып отырғандығын, бұл өз кезегінде өңірдің азық-түлік қауіпсіздігі мен әлеуметтік-экономикалық дамуына, жаңа жұмыс орындары мен салық базасының нығаюына өз септігін тигізетіндігін атап өтті.