Ыстамбұлда нөсер жауын селге ұласты

Нұр-Сұлтан, BAQ.KZ. Ірі шаһарда бір түнде 7 мыңнан астам найзағай түсті. 

Бұл туралы апат және төтенше жағдайлар Басқармасы мәлімдеді, деп хабарлайды «Хабар 24». 

Жолды су шайып, 800-ге жуық үй мен кәсіпорынның бірінші қабатын су басқан. Зардап шеккендер жоқ. Шығын көлемі анықталып жатыр. 

Синоптиктер Ыстамбұлмен қоса 21 провинцияда нөсерлі жауын-шашын болатынын ескертіп, тұрғындарды тысқа шықпауға шақырды. Биылғы маусым Түркия үшін жауын-шашынды. Бірер апта бұрын ел астанасы Анкарада селден 1, Кастамону провинциясында 3 кісі қаза тапқан еді. 

Алғашқы кезекте сел шайып өткен үйлерге 5 мың лира, дүкен мен кәсіпорындарға 10 мың лира төленеді. Адам шығыны жоқ. Сол қуантады. Жергілікті әкімдікпен келістік. Зардап шеккендер анықталып, көмек дер кезінде жеткізіледі, - деді Ішкі істер министрі Сүлейман Сойлу.