Волонтер күріш арналарындағы балықтарды қалай құтқаратынын айтты

Эльдар Мнаж «Жануарларды қорғау мәселелеріне үлес қосқаны үшін» номинациясы бойынша «Жыл волонтері» сыйлығын иеленді, деп хабарлайды BAQ.KZ тілшісі.

Еріктіден оның волонтерлық жұмысы туралы сұрадық.

Мен Астана медицина университетінің 3-курсында оқимын. Сондықтан волонтерлық ұйымым Қызылорда облысында 1 айдың көлемінде жұмыс істейді. Яғни тамыз айынан қыркүйектің 5-6-сына дейін. Сол 1 айдың көлемінде біз 80 мыңнан 100 мың балыққа дейін құтқарамыз, - деді Эльдар.

Оның айтуынша, сәуір айының 15-нен бастап барлық күріш арналарына су жіберіліп, суару маусымы басталады. Ал балықты құтқаратын еріктілер жұмысы тамыз айында қызады.

Тамыз айының 15-нен бастап барлық күріш арналарының суын тартады. Суды тартқаннан кейін шалшық суда кішкентай балықтар қалып қояды. Бір шалшық суда шамамен 4-5 мың майшабақ қалады. Сол майшабақтарды арнайы торлармен сүзіп алып, бөшкелерге салып, көл иелеріне немесе Сырдария өзеніне жібереміз, - дейді волонтер.

Эльдардың сөзінше, Қызылорда облысында 2 мыңнан аса волонтер, 50-ден астам волонтерлық ұйым бар. Волонтер сол ұйымдардың арасында өзі басқаратын ұйымның үздік деп танылғанына дән риза.