Вице-министр көлеңкелі экономика деңгейін төмендету шараларын атады

Нұр-Сұлтан, BAQ.KZ тілшісі. ҚР қаржы бірінші вице-министрі Берік Шолпанқұлов көлеңкелі экономика деңгейін төмендету шаралары туралы айтты.

Берік Шолпанқұловтың мәліметінше, бизнесті көлеңкеден шығару бойынша жұмыс салық-кеден саясатын жетілдіру және қолма-қол ақшаның үлесін қысқарту жолымен жүргізілуде.

"Өткізілетін іс-шаралар салықтық және кедендік әкімшілендіруді цифрландыруға, ақпараттық жүйелерді ықпалдастыруға негізделген. Онда "Тауарларды таңбалау", "Электрондық шот-фактуралар", "Виртуалды қойма", "Тәуекелдерді басқару жүйесі", "Онлайн-касса" және тағы сол сияқты ақпараттық жүйелерді дамытудан үлкен нәтиже күтіледі. Тауарларды қадағалау жүйесін құру экономиканы контрафактілік өнімдерден қорғауға мүмкіндік береді", - деді Шолпанқұлов Үкіметтегі баспасөз мәслихатында.

Оның айтуынша, "Электрондық шот-фактуралар" ақпараттық жүйесі тауарлардың соңғы тұтынушыға дейінгі қозғалысын бақылауға мүмкіндік береді. Ал "Виртуалды қойма" модулі автоматты режимде тауар қозғалысының процесін қадағалауға көмектеседі.

Вице-министр еліміздегі көлеңкелі экономикамен күрестің басқа да жолдарын атады. Ол іске асырылып жатқан бастамалар мен қабылданып жатқан шаралар көлеңкелі экономиканы қысқартуға, бюджетке салық және кедендік түсімдерді ұлғайтуға мүмкіндік беретінін айтты.