V Дүниежүзілік көшпенділер ойынына дайындық пысықталды

Туризм және спорт министрі Ермек Маржықпаев Астанадағы 5-ші Дүниежүзілік көшпенділер ойындары аясындағы Қырғыз Республикасының Мәдениет, ақпарат, спорт және жастар саясаты министрінің орынбасары Шыңғыс Есенғұлуулумен кездесті, деп хабарлайды BAQ.KZ ведомствоға сілтеме жасап.

Ермек Маржықпаев қырғызстандық әріптесіне ынтымақтастық үшін алғыс білдіріп, биылғы спорттық жарысқа әлемнің 89 елі қатысуға өтініш білдіргенін атап өтті.

Ойындарға дайындық аясында «Қырғыз Республикасының балалар олимпиадалық ауылы» қоғамдық бірлестігі, құқық иесімен «Дүниежүзілік көшпенділер ойындары» логотипі мен брендін өтеусіз пайдалануға лицензиялық келісім жасалды. 5-ші Дүниежүзілік көшпенділер ойындары (ДКО) Хатшылығының Бішкек кеңсесінің ұсыныстарына сәйкес, біз ойындарды өткізу дәстүрін сақтауға бағытталған бірқатар міндетті талапты ескердік. Соның ішінде ДКО-ның логотипінде көшпенділердің қасиетті символы ретінде су элементін сақтап қалдық, - деді ҚР Туризм және спорт министрі.

Ермек Маржықпаев Ойындардың ашылу салтанатында спортшылар шеруін Қырғыз Республикасының өкілдері бастайтынын жеткізді. Сондай-ақ атақты қырғыз композиторы Эмиль Кенжекулов жазған әнұран орындалады.

Астанадағы 5-ші Дүниежүзілік көшпенділер ойындары спорттың 21 түрінен өтіп, 97 медаль жиынтығы сарапқа салынады. Көшпенділер ойындарының бағдарламасы спорт, мәдениет және ғылым бағытындағы оқиғаларды қамтиды.

Естеріңізге сала кетейік, Дүниежүзілік көшпенділер ойындары ЮНЕСКО-ның материалдық емес мәдени мұра тізіміне енеді және 8-13 қыркүйек күндері Астанада өтеді. Елордаға 2000-нан астам спортшы мен ресми тұлғалар, 100 мыңнан астам турист келеді деп күтілуде. Ойындарды дайындау мен өткізуге 1000 ерікті жұмылдырылады.