«Үй, жер алып беремін». Алматыда тұрғындарды алдап келген алаяқ ұсталды

Алматы, BAQ.KZ.  Алматы полициясы азаматтарды 400 миллион теңгеден астам соммаға алдап соққан күдіктіні ұстады. Бұл туралы алматы ПД-нің баспасөз қызметі хабарлады.

Алматы қалалық Полиция департаментінің Тергеу басқармасы 1977 жылы туған, Шығыс Қазақстан обласының тумасы Ш.есімді азаматқа қатысты сотқа дейінгі тергеуді жүргізуде. Ол 2014 жылдан бастап қазіргі уақытқа дейін, Алматы қаласының аумағында жүріп, “Хан Тенгри” тұрғын үй кешенінен “жалға берілетін тұрғын үй” мемлекеттік бағдарламасы бойынша тұрғын үй алу, сондай-ақ, жер учаскелері мен қамауға алынған көлік құралдарын электрондық саудадан алып беремін деп сылтауратып, бірқатар жәбірленушілерді алдау және сеніміне қиянат жасау арқылы, олардың қаражаттарын ірі көлемде иемденіп, 400 миллион теңгеден астам материалдық шығын келтірген. 

«Аталған дерек бойынша ҚР ҚК-нің 190-бабы 4-бөлігі, 2-тармағына сәйкес қылмыстық құқық бұзушылық белгілері бойынша сотқа дейінгі тергеу басталды.  Ш.азамат күдікті деп танылды.  Ол Қазақстан Республикасының Қылмыстық іс жүргізу кодексінің 128-131 баптарына сәйкес уақытша ұстау изоляторына қамалды.  Алматы қаласының мамандандырылған ауданаралық тергеу соты күдіктіге қатысты қамауға алу түріндегі бұлтартпау шарасын таңдады.  Қазіргі уақытта тергеу амалдары жалғасуда»,-дейді Алматы қаласы ПД Тергеу басқармасы бөлімінің бастығы Әділ Салаев.  

Алматы полициясы аталған азаматтың заңсыз әрекеттерінен зардап шеккендер болса мына мекен-жайға жүгінуге шақырады: Алматы қ., Масанчи к-сі, 55 үй, Алматы қаласы ПД ТБ ОРППОП ішкі істер органдарының аға тергеушісі, полиция майоры  И.Г.Литвиненко ж.т. 261-84-90, 254-40-59 және 8-775-284-55-56.