Ұстаз болу – тек білім беру емес, баланы үлкен өмірге дайындау - директор

Ұстаздық жолда атқарған адал еңбек ешқашан бағасыз қалмайды. Жаңа оқу жылы басталғалы жас мамандардың іскерлігі артып, оқушылармен қарым-қатынасты нығайту әдістемелері көпшіліктің көңілінен шығып жатыр. Осы ретте, Алматыдағы BAQ.KZ тілшісі күні кеше әлеуметтік желіде балалармен қосылып билеген, халықтың ыстық ықыласына бөленген №209 мектеп- гимназиясының директоры Болат Мунбаевпен сұхбаттасты.

Жас болса да, бас болып, елеулі қызметті атқарып жүрген азамат әрбір баланың өз ерекшелігі бар екендігін және сол ерекшеліктерді анықтап, оларды дамыту – мұғалімнің басты міндеті екенін атап өтті. Балаға дұрыс бағыт көрсетіп, оның мықты жақтарын қолдау арқылы мұғалім оны болашақта жетістікке жеткізе алатынын айтты.

- Еңбек жолыңыз жайлы айта кетсеңіз, ұстаздық ұлы жолға қалай келдіңіз?

- Менің ұстаздық жолым – бала кезімнен бастау алған арманымның жемісі. Мектепте оқып жүргенде ұстаздарымның еңбегін көріп, олардың маған көрсеткен қолдауын сезініп, осы жолға түсуге бел будым. Университетке түскеннен кейін педагогика мен психологияны терең зерттей бастадым және ұстаздықтың тек пәнді оқыту емес, адамның жүрегіне жол табу екендігін түсіндім. Бұл жолдың әр қадамында балаларға, олардың дамуына, болашағына үлес қосуды мақсат еттім.

- Балаға білім беруде, оның білімге құштарлығын ашуда қандай жұмыстар атқарылуы керек?

- Білімге құштарлықты ояту – бұл ұзақ мерзімді және тұрақты жұмыс. Баланың қызығушылықтарын анықтап, соларды дамыту маңызды. Мектепте оқу бағдарламасы әр оқушының жеке қабілеттерін ескере отырып құрылуы керек. Сонымен қатар, түрлі жобалар, практикалық тапсырмалар, интерактивті сабақтар арқылы оқушыны белсенді түрде оқу процесіне тарту қажет. Балалардың шығармашылық қабілеттерін дамыту, өз идеяларын жүзеге асыруға мүмкіндік беру де маңызды рөл атқарады. Оған қоса, мұғалімнің өзі де білімге құштар болуы керек, себебі ұстаздың үлгісі – оқушыға ең үлкен мотивация.

- Қазіргі уақытта балалардың телефонға тәуелділігі байқалады, бұл білімге кедергі келтіре ме?

- Смартфонға тәуелділік – қазіргі заманның үлкен мәселелерінің бірі. Әрине, бұл білім беру процесіне де әсерін тигізеді. Балалар көбінесе сабақтан алаңдап, зейіндерін толық аудармауы мүмкін. Дегенмен бұл жағдайды да өз пайдамызға қолдана аламыз. Телефонды дұрыс бағытта пайдалануға, оны білім алу құралына айналдыруға болады. Арнайы білім беру қосымшалары, онлайн курстар мен видео сабақтар арқылы оқушылардың білімге деген қызығушылығын арттыруға болады. Бірақ бұл жерде ең бастысы – балаларға шектеулерді түсіндіру және оларды саналы түрде телефонды пайдалануға үйрету.

- Ұстаздық ұлы жолда әртүрлі балалармен жұмыс істеуге тура келеді. Баламен жұмыс істеу қиын емес пе?

- Әрине, әр бала – жеке әлем, сондықтан әрқайсысымен жұмыс істеу өзіндік қиындықтарын туғызады. Бірақ бұл қиындықтар – тек мүмкіндік. Әрбір баланың өз ерекшелігі бар және сол ерекшеліктерді анықтап, оларды дамыту – мұғалімнің басты міндеті. Балаға дұрыс бағыт көрсетіп, оның мықты жақтарын қолдау арқылы біз оны болашақта жетістікке жеткізе аламыз. Ұстаз болу – тек білім беру емес, балаға сенім артып, оны үлкен өмірге дайындау. Осы жолда қиындықтармен бетпе-бет келу – бұл ұстаздық қызметтің ажырамас бөлігі.

- Еліміздегі білім деңгейі салыстырмалы тұрғыда қалай өскен? Көңіліңіз тола ма?

- Еліміздегі білім беру деңгейі соңғы жылдары айтарлықтай өзгерістерге ұшырады. Заманауи технологиялар мен жаңа әдістемелердің енгізілуі білім сапасын жақсартуға септігін тигізді. Бірақ, әрине, әлі де жетілдіретін тұстары бар. Мектептердің материалдық-техникалық базасын жақсарту, мұғалімдердің біліктілігін арттыру, білім беру процесіне заманауи әдістерді енгізу бойынша жұмыс жалғасуы тиіс.

- Жас мұғалімдерге берер кеңесіңіз қандай?

- Мамандарға айтарым – ешқашан тоқтап қалмау. Үнемі ізденіс үстінде болу, жаңа нәрселерді үйрену, өздерін жетілдіру маңызды. Оқушылармен шынайы байланыс орнатуға тырысыңыз, олардың сеніміне ие болыңыз. Сабақ беру – тек білім беріп қана қоймай, сонымен қатар баланың өміріне әсер ету, оның тұлға ретінде қалыптасуына ықпал ету. Осыны ұмытпаңыз. Ең бастысы – өз жұмысыңызды сүйіңіз, себебі шын жүректен жасалған іс ғана нәтиже береді.

- Әңгімеңізге рахмет!