Университет оқытушыларына жалақы жаңа жүйе бойынша төленеді

Елордада өтіп жатқан Жоғары білім және ғылым форумында Премьер-министрдің орынбасары - Еңбек және халықты әлеуметтік қорғау министрі Тамара Дүйсенова оқытушыларға жалақы төлеудің жаңа жүйесін енгізу керек екенін айтты, деп хабарлайды BAQ.KZ тілшісі.

Ол университет оқытушыларының жалақысы мәселесіне тоқталды.

Мен сіздердің жалақы мәселелеріңіз туралы білемін. Ол лайықты болуы керек деп санаймын. Жалақыны төлеудің жаңа жүйесін енгізу қажет. Министрлік әр ұйымның ерекшелігіне қарай бейімделетін еңбекақы төлеудің үлгілік жүйесін әзірлеуі керек, - деді Дүйсенова форумда.

Вице-премьердің сөзінше, еңбекақы төлеу жүйесі енгізілгеннен кейін оның грант бағасына қалай әсер ететінін есептеу керек.

Тамара Дүйсенова министрлікке және университет ректорларына ЖОО-лардың оқытушыларына төлейтін еңбекақының жаңа схемасын әзірлеуді жылдың соңына дейін аяқтауды тапсырды.