Үндістанда пойызға асыққан адамдар бір-бірін таптап көз жұмды

Үндістан астанасы Делидегі теміржол станциясында қайғылы жағдай болды, деп хабарлайды BAQ.KZ.

The Guardian таратқан мәліметке сүйенсек, адамдар бір-бірін таптап, салдарынан жиырмаға жуық адам, оның ішінде, тоғыз әйел мен үш бала көз жұмды. Сондай-ақ 11 адам түрлі дене жарақатын алған.

Станцияда адамдардың көп жиналуына қасиетті орындарға жаппай қажылық жасау – Кумбха Мела рәсімі себеп болғаны айтылды. Әр 12 жыл сайын аталған мейрамда солтүстікте орналасқан Праяградж қаласына ондаған миллион діндарлар легі ағылады.

Оқыс оқиға адамдар іс-шараға қатысу үшін өз пойыздарына үлгеру үшін жүгірген сәтте басталған.

Айта кетерлігі, қаңтардың аяғында да осы мерекені тойлау кезінде 30 адам қайтыс болған.