«Ұлы даланың ұлы қыздары» білім сайысы өтті

Нұр-Сұлтан, BAQ.KZ. Қазақ ұлттық қыздар педагогикалық университеті еліміздегі мектеп оқушыларының зияткерлік әлеуетін көтеру жолында көптеген жоба мен іс-шараларды жүйелі жүзеге асыруда.

Тарих және шетел тілдері институтының қолдауымен өтетін дәстүрлі білім додасы биыл да ұйымдастырылып, өз мәресіне жетті.

«Рухани жаңғыру» бағдарламасы аясындағы олимпиадаға Түркістан, Қызылорда, Алматы облыстары мен Шымкент және Алматы қалаларындағы мектеп оқушылары қатысты.

Сайыстың бірнеше кезеңнен тұратын іріктеуінен өткен 8 команда ақтық мәреде өз білімдерін паш етіп, 5 айналым бойынша тапсырмаларды орындады. Атап айтқанда, білім алушылар «Таныстыру», «Тарихи хронология», «Ұлы даланың қаһарман қыздары», «Тарихи терминология» және «Ой толғау» турлары бойынша өзара мықтыны анықтады.

«Тарихи хронология» атты екінші айналымда әр команда ұяшықтардың артында жасырылған тарихи даталардың мағынасын дұрыс ашуы тиіс. Үшінші турда қатысушыларға «Ұлы даланың қаһарман қыздары» тақырыбындағы арнайы бейнетаспаға түсірілген сауалдар қойылды.

«Тарихи терминология» атты төртінші айналымның шарты бойынша әр команда тарихи терминдерге 3 деңгей негізінде анықтама беруі тиіс. Соңғы кезең «Ой толғау» деп аталды. Бұл айналымдаел тарихындағы есімдері ұлықталған ұлы қыздар туралы эссе сұрақтар жеребе негізінде әр команда жетекшісіне үлестіріледі. Шарт бойынша сайыскер тапсырманы орындауға берілетін 10 минутта 100 сөзден кем емес эссе жазуы тиіс.

Республиканың әр аймағынан жиналып, бір арнада бас қосқан білімпаз жастар қойылған сауалдарға жауап беріп, берілген тапсырмаларды орындау барысында ойларын жан-жақты тұжырымдай білді. Тарих пәнінен алған таным деңгейлерін айқын көрсетті. Қазылар алқасы әрбір топтың жауаптарына қатысты өз ұсыныстары мен пікірлерін білдіріп, тиісті бағаларын берді, – дейді қазылар алқасының мүшесі, тарих ғылымдарының кандидаты Ердәулет Берлібаев.

Олимпиада қорытындысы бойынша бірінші орынға Алматы облыстық №15 мектеп-интернатының оқушыларынан құралған «Қайсар қыздар» тобы лайық деп танылды. Екінші орынды Қызылорда облысының Сырдария ауданындағы №37 мектеп-лицейінің «Тұмар» тобы мен Шымкент қаласындағы №90 гимназиясы иеленсе, үшінші орынды Алматы облысының Қаскелең қаласындағы Абай атындағы орта мектеп-гимназиясының «Хансұлу» және Алматы қаласындағы №15 гимназиясының «Қағанат» командалары өзара бөлісті.

Жеңімпаздар мен жүлдегерлер Алғыс хаттармен және дипломдармен марапатталды.