"Ұлттық қор – балаларға": Бағдарламаға тағы бір уәкілетті оператор қосылды

"Ұлттық қор - балаларға" бағдарламасы бойынша тағы бір уәкілетті оператор қосылды, деп хабарлайды BAQ.KZ.

Бұл туралы Бірыңғай жинақтаушы зейнетақы қоры мәлімдеді.

Енді оқуға төлеуге арналған нысаналы жинақ төлемдерін алу үшін "Отбасы банкі" "Тұрғын үй құрылыс жинақ банкі" АҚ-нан бөлек, жақында БЖЗҚ келісімшарт жасасқан "Қазақстан Халық банкі" АҚ-на жүгінуге болады. Тұрғын үй жағдайын жақсарту мақсатына төлемдерді алу үшін "Отбасы Банкі"  "Тұрғын үй құрылыс жинақ банкі" АҚ жалғыз уәкілетті оператор болып қала береді, - делінген хабарламада.

Естеріңізге сала кетейік, 2024 жылдың 1 қаңтарынан бастап 18 жасқа толмаған Қазақстан Республикасының барлық балалары "Ұлттық қор - балаларға" бағдарламасына қатысушы болды. Балаларға жыл сайын қатысудың әр жылы үшін инвестициялық кірісті қоса алғанда, нысаналы талаптар түрінде Ұлттық қордан қаражат есептеледі. 

18 жасқа толған атаулы жинақтарды алушылар немесе олардың заңды өкілдері уәкілетті операторлардың біріне хабарласып, қаражатты тұрғын үй жағдайын жақсартуға және/немесе оқу ақысын төлеуге пайдалана алады.