Ұлт қайраткерінің мерейтойына орай Тараз қаласында ескерткіші бой көтерді

Биыл аса көрнекті мемлекет қайраткері Дінмұхамед Қонаевтың туғанына 110 жыл толды. Атаулы датаға орай, Тараз қаласының төрінен ұлт перзентіне арналған ескерткіш бой көтерді, деп хабарлайды BAQ.KZ меншікті тілшісі.  

Өткен сенбіде оның құрметіне Тараз қаласының орталық көшелерінің біріндегі Д.Қонаев атындағы саябақта зәулім ескерткіштің салтанатты ашылуы өтті.

Ескерткішті салтанатты түрде ашу миссиясы КСРО және Қазақ КСР халық әртісі, Жамбыл облысының Құрметті азаматы Асанәлі Әшімовке, Қазақстан Республикасы Ақпарат және әлеуметтік даму министрі Асқар Умаровқа, Жамбыл облысының әкімі Нұржан Нұржігітовке, отставкадағы генерал-лейтенант Амангелді Шабдарбаевқа, Д.Қонаев атындағы халықаралық қордың президенті Эльдар Қонаевқа тапсырылды.

Бүгін шын мәнінде тарихи күн – ұлы тұлғаның ескерткіші ашылды. Осындай ескерткіштер енді барлық облыс орталықтарында бой көтереді деп ойлаймын. Мен оның қасында болу бақытына ие болдым, бір емес бірнеше рет кездестім және бұл мен үшін әр жолы үлкен оқиға болды. Димаш Ахметұлының күш-жігерінің арқасында 42 жасымда маған КСРО халық әртісі деген жоғары атақ берілді. Ал мен Димаш Ахметұлының алдында әлі күнге дейін бас иіп жүргендердің бірімін. Ол мәдениет пен өнердің өркендеуіне көп еңбек сіңіріп, дарынды тұлғаларды үнемі қолдап, жан-жақты қолдау көрсетіп отырды. Оның кеңесімен сценарий жазылып, Чекист Қасымхан туралы әйгілі фильм түсірілді. Ал тарихта мұндай мысалдар көп, – деді Асанәлі Әшімов.

Министр Асқар Умаров биыл Дінмұхамед Қонаевтың туғанына 110 жыл толып отырғанын атап өтті.

Оның ұлылығы – халқын жоғары қойып, қадірлеуінде. Ірі мемлекет қайраткері болғандықтан, ол тек Алматыны және басқа да ірі қалаларды дамытумен шектеліп қалмады, шет аймақтарға жиі барды, қарапайым халықпен кездесті. Ал бұл – жоғары азаматтық сананың, халық тарихына деген құрметтің нағыз үлгісі. Бүгінгі жастар осының бәрін біліп, түсінуі керек, – дейді Асқар Умаров.

Қайраткердің інісі Эльдар Қонаев Димаш Ахметұлының өңірдің тұрғындарына жылы лебізін білдіріп, осында жиі келетінін еске алды.

Есімде, 1992 жылы зейнет демалысында жүрген ол осында келіп, халық оны Таразда, Қаратауда, Талас өңірінде зор ілтипатпен қарсы алды. Содан ол кісінің қасында жүргенде халқымызбен де, Димаш Ахметұлымен де мақтандым. Ал, бүгін Қонаевтар әулетінің атынан сіздердің алдарыңызда бас иемін, – деді Эльдар Қонаев.

Ал отставкадағы генерал-лейтенант Амангелді Шабдарбаев саяси қайраткерден көп тәлім алғанын жеткізді.

Біз, қазір генералдар, Алматыдан бір топ болып келдік. Дінмұхамед Қонаевпен естен кетпес жұмыс кезінде аға лейтенант, капитан шенінде болдық, қызметі мен дәрежесінің үлкен айырмашылығына қарамастан, ол барлық адамдарға құрметпен қарайтын. Мен осы ұлы тұлғаның үш ескерткішінің ашылуына қатыстым және оның мінезі мен рухын ең әдемі де айбынды Тараз толық көрсетеді деп ойлаймын. Менен басшы қандай болуы керек деп сұраса, мен бірден Қонаев сияқты – қатал, шыншыл, талапшыл, жарқын, мейірімді, халқын сүйетін болуы керек деп айтамын. Ал бүгінгі жастардың Дінмұхамед Ахметұлының өмірі, атқарған істері мен жұмыстары туралы көбірек білуі өте маңызды, – деді ұзақ жылдар бойы оның адал серігі, жеке қауіпсіздік басқармасының бастығы болған отставкадағы генерал-лейтенант.

Ал салтанатты ашылу рәсімінен кейін А.Тоқпанов атындағы Жамбыл облыстық қазақ драма театрында Д.Қонаевты еске алуға арналған салтанатты жиын өтті.

Елімізде өзінен жақсы естелік қалдырғандар көп, оның алғашқыларының бірі, әрине, Дінмұхамед Ахметұлы Қонаев. Ол 50 жылға жуық ірі басшылық қызметтерде болып, Қазақстанды КСРО-ның жетекші республикаларының қатарына қосты. Оның тұсында 68 жұмысшылар поселкесі, 43 қала, соның ішінде біздің Жаңатас қаласы салынды. Ауыл шаруашылығы дамыды, республиканың түсті, сирек, асыл металдарды өндірудегі рөлі күрт артты, қара металлургия қарқынды дамыды. Машина жасау және металл өңдеу үлкен салаға айналды. Аспап жасау, энергетика және автомобиль өнеркәсібі, химия, мұнай, құрылыс және жол құрылыс кәсіпорындары іске қосылды. Республика сондай-ақ отын-энергетика саласының ірі орталығына айналды, жүзден астам мұнай мен көмір кен орындары игерілді және өндірілді. Дәл сол жылдары сары фосфор өнеркәсібі қарқынды дамып, Қазақстанға сары фосфор өндіру бойынша бірінші орынға шығуға мүмкіндік берді. Мәдениеттің, білімнің, ғылымның және басқа да салалардың деңгейі үздіксіз көтеріліп, шетелде үлкен қызығушылық тудырды. Дінмұхамед Ахметұлы өзінің ұлылығымен халқын сүйетін тұлға болып қала берді», – деп атап өтті облыс әкімі Нұржігітов.

Бір топ қоғам қайраткерлері, демеушілер, мүсіншілер Жамбыл облысы әкімінің, Д.Қонаев атындағы халықаралық қор басшылығының атынан естелік сыйлықтармен, грамоталармен және медальдармен марапатталды.