Үлкен шаңырақтағы ұрыс: Екі келіннің дауы төбелеске ұласты

Ақтөбеде енесінің үйінде болған екі келіннің арасындағы тұрмыстық жанжал төбелеске ұласып, іс сотқа жетті, деп хабарлайды BAQ.KZ тілшісі.

Ақтөбе қаласының №2 соты келіндердің үстінен қозғалған қылмыстық істі қарады.

Әйелдер ҚР Қылмыстық кодексінің 109-1-бабының 1-бөлігі бойынша (денсаулыққа жеңіл зиян келтірмей, дене ауруын келтіретін ұрып-соғу немесе өзге де күш қолдану) айыпталған.

Оқиға 2025 жылғы мамырда келіндердің енесінің үйінде болған. Айтыс-тартыс барысында олар бір-біріне қол көтерген.

Сот отырысында әйелдер өз кінәларын мойындамады. Алайда сот олардың кінәсі жәбірленушілер мен куәгерлердің айғақтарымен, сондай-ақ іс материалдарымен дәлелденгенін айтты.

2025 жылдың мамыр айында екі келін енелерінің үйінде бола тұра, отбасылық жанжал кезінде бір-біріне қасақана дене жарақаттарын келтірген. Жанжал барысында екеуі сөзге келіспей қалған, - деп жазылған сот хабарламасында.

Сот үкімдерімен сотталушылар ҚК-нің 109-1-бабының 1-бөлігі бойынша кінәлі деп танылып, оларға 25 айлық есептік көрсеткіш мөлшерінде, яғни 98 300 теңге айыппұл салынды. 

Үкім заңды күшіне енген жоқ.