Үлкен Алматы көліне баратын жол жабылды

Үлкен Алматы көліне автокөлікпен көтерілуге тыйым салынды, деп хабарлайды Алматыдағы BAQ.KZ тілшісі. 

Тамыз айында Үлкен Алматы көліне автокөлікпен көтерілуге рұқсат берген еді. Дегенмен бір айдың ішінде тұрғындардың табиғатты ластап, қоқыстарын шашып кеткен бейнежазбасы әлеуметтік желіде қызу талқыға түсті. Бұл жайт БАҚ-да жарияланған еді. Нәтижесінде көлге апаратын жол қайтадан жабылды. Оған қайтадан жаяу немесе велосипедпен көтерілуге тура келеді.

Республикалық маңызы бар Алматы-Космостанция автомобиль жолының учаскесінде 15-34 километрге көлік құралдарының қозғалысына шектеу енгізілді. Бұл қозғалыс адамдар мен табиғаттың қауіпсіздігін қамтамасыз ету, тәртіпті сақтау және қорғау үшін жасалған, – дейді «Қазавтожол» қызметкерлері.

Баспасөз қызметі Үлкен Алматы көліне кімдердің көлікпен кіретінін айтып өтті. 

Бектілген тізімге сәйкес, қызметтік міндеттемелерді орындау үшін жүріп өтуге рұқсат етілетін қызметтік автокөліктер бар. Олар Ұлттық саябақ қызметі, шекара заставасы, «Космостанция» ғылыми базасы, метеорологиялық және гидрологиялық қызметтер, Алматы қаласының туризм басқармасының қызметкерелері кіре алады, – дейді «Қазавтожол» баспасөз қызметі.

Еске сала кетейік, 22 тамыздан 14 қыркүйекке дейін ҮАК аумағынан 4200 келі қоқыс шығарылған еді.