ТЖМ қызметкерлері тұрғын үй секторында рейдтер жүргізуде

Өңірлерде жылыту кезеңінде тұрғын үй секторындағы өрттердің алдын алу, өрт кезінде адамдардың қаза табуы және көміртегі тотығымен улану бойынша іс-шаралар жоспары іске асырылуда, деп хабарлайды BAQ.KZ Төтенше жағдайлар министрлігіне сілтеме жасап.

Осылайша, Ұлытау облысы ТЖД қызметкерлері жергілікті атқарушы органдарымен, полициямен және "Бірлік" волонтерлік ұйымымен бірлесіп, 882 тұрғын үйді аралап, өрт қауіпсіздігі талаптарының ережелерін түсіндіру жұмыстарын жүргізді.

Өрт-профилактикалық жұмысты жүргізу мақсатында әлеуметтік қорғау органдарының, жергілікті атқарушы органдарының деректері бойынша пешпен жылытылатын 365 жеке тұрғын үйде тұратын халықтың әлеуметтік осал топтарының тұрғын үй тізімдері қалыптастырылды. Осы әлеуметтік осал топтағы үйлерге көміртегі тотығын анықтайтын датчиктерін орнату кезең-кезеңімен жалғасуда. Бүгінгі күнге дейін 93 датчик орнатылды.

Біз үшін азаматтардың қауіпсіздігі бірінші орында, ол үшін біз тұрғын үй секторында үнемі профилактикалық жұмыстар жүргіземіз. Азаматтарға үйдегі өрттің алдын алу үшін өрт қауіпсіздігінің негізгі ережелерін сақтауды ескертеміз, - деп атап өтті ТЖД бастығының орынбасары Шыңғыс Самиев.