Түркістан облысында "Шәмші аллеясының" құрылысы басталды

Ордабасы ауданының құрылғанына 60 жыл толуына орай Темірлан ауылында Қазақстанның халық әртісі, композитор, қазақ вальсінің королі Шәмші Қалдаяқовтың құрметіне "Шәмші аллеясының" құрылысы басталды, деп хабарлайды BAQ.KZ.

Нысанның құрылыс жұмыстарын жүргізіп жатқан мердігер мекеме аллеяны биыл шілде-тамыз айларында қолданысқа бермек. Онда сазгердің ескерткіші, сахна, орындықтар орнатылатын болады.

Айта кетсек, Шәмші Қалдаяқов - 1930 жылы 15 тамызда Отырар ауданы, Шәуілдір ауылында дүниеге келген. Оның 300-ге жуық ән мұрасы бар. Бүгінде сазгердің "Ақ сұңқарым", "Ақ бантик", "Қара көз", "Қайықта" секілді әндері жұртшылық арасында кеңінен танымал. Сондай-ақ, жігерлі әрі қуанышпен шырқалатын "Бақыт құшағында", "Менің Қазақстаным", "Бәрінен де сен сұлу", "Теңіз құшағында" әндері ел арасына кең тараған.