2018 жылы «Цифрлық Қазақстанға» бағытталған қаржы 99,8% игерілді

Астана, BAQ.KZ тілшісі. ҚР Ақпарат және коммуникациялар министрі Дәурен Абаев Үкімет отырысында 2018 жылы «Цифрлық Қазақстан» мемлекеттік бағдарламасы бойынша атқарылған жұмыстар туралы баяндады. 

«2018 жылы «Цифрлық Қазақстан» мемлекеттік бағдарламасы бойынша 20 іс-шараны жүзеге асыру жоспарланды. Сол жоспарға сай жұмыстар толық орындалды. Бұл қаржының 99,8% игерілді. «Экономика салаларын цифрландыру»  бағыты бойынша келесі маңызды нәтижелерге қол жеткіздік.   Мәселен: отын-энергетикалық және тау-кен металлургиялық кешендерінде 4.0 Индустриясы элементтерін қолдану арқылы: еңбек өнімділігі орташа есеппен 10% артты, жекелеген өндірістерде электр қуаты 33% дейін үнемделді, жабдықтарды пайдалану коэффиценті 50% ұлғайды», - деді Дәурен Абаев.

Министр пайдалы қазбалары бар 7 ірі кен орындарына «Интеллектуалды кен орны» және «Цифрлық бұлақ» жобалары енгізілгенін айтты.

«Ембімұнайгаз» акционерлік қоғамының УАЗ шоғырында мұнай өндіруді 773 тоннаға арттыруға мүмкіндік пайда болды. Ал электр қуаты 33% үнемделді. 2019 жылы осындай жүйе бойынша жұмыс жасайтын нысандар санын 12 бірлікке жеткізу жоспарланып отыр», - деді ақпарат және коммуникациялар министрі.

Оның айтуынша, тау-кен өнеркәсібінде 102 кәсіпорын «айқын» өндіріс деңгейіне ауыстырылған. Бұл барлық өндіріс дерегін цифрландыруға және ақпараттық ағынды басқаруға жол ашады.

«Бүгінде 4 жоба пайдалануға берілді. Аталған кәсіпорындарда цифрлық технологияларды қолдану есебінен өнімділік 10% артты, еңбек шығындары 30% дейін және өндірістік шығындар 10% дейін төмендеді. Іске қосылған  «Өскемен титан-магний комбинаты» өндіріс баланстарын қалыптастыру және есептеу жүйесін енгізуге арналған жобалардың бірі «ҚБТУ инжиниринг және ақпараттық технологиялар» АҚ отандық ұйымның цифрлық шешімдеріне жұмыс істейді», - дейді Абаев. 

Ол қорларды жоспарлау ақпараттық жүйесін енгізу арқылы ERG кәсіпорны ендігіде бірегей, біртұтас құрылымдалған массив бойынша жұмыс атқаратынын айтты. 

«Бизнес-процестер стандартталған әрі ашық түрде жүргізіледі. Қызметкерлер қосымша білім алды, 250 жаңа жұмыс орны құрылды. Жобадан түсетін экономикалық пайда  2021 жылы 123 миллиард теңгені құрайды», - деді министр.

Назерке АБИБУЛЛА