Тоқаев: Ұлан-ғайыр жері бар Қазақстанда жайылым жоқ деген – еш қисынға келмейді

Бұл туралы Мемлекет басшысы Қарағанды өңіріне сапары барысында айтты, деп хабарлайды BAQ.KZ.

Менің тапсырмаммен ауыл шаруашылығы жерлеріне ғарыштан мониторинг жасалды. Республика бойынша игерілмей бос жатқан 20 миллионнан астам гектар жайылым жер анықталды. Оны мемлекет меншігіне қайтарумен айналысатын арнайы комиссия жұмыс істеп жатыр. Қазірдің өзінде 4,2 миллион гектардан астам алқап қайтарылды. Соның ішінде 1,1 миллион гектар жер Қарағанды облысына тиесілі, – деді Мемлекет басшысы.

Сондай-ақ Президент  қайтарылған жерді жергілікті шаруаларға әділ бөліп беру қажет екенін айтты.

Әлемде 9 орын алатын ұлан-ғайыр жері бар Қазақстанда жайылым тапшылығы деген – еш қисынға келмейтін нәрсе. Осы кең байтақ жеріміздің игілігін латифундистер емес, қарапайым халық көруі керек. Сондықтан, ендігі мәселе – қайтарылған жерді жергілікті шаруаларға әділ бөліп беру қажет. Сонда ғана фермерлердің өз шаруашылығын адал жүргізуге сенімі артады, – деді Президент.