ТМҰ өкілдері Нью-Йоркте кездесті

Түркі мемлекеттері ұйымына мүше елдердің сыртқы істер министрлері Қазақстанның БҰҰ жанындағы тұрақты өкілдігінде бас қосты, деп хабарлайды BAQ.KZ Хабар24-ке сілтеме жасап.

Нью-Йорктегі кездесуде ұйым аясындағы ынтымақтастықтың тереңдеп, өзара байланыстың артатыны айтылды. Еліміздің сыртқы істер министрі Мұрат Нұртілеу түркі интеграциясының халықаралық деңгейдегі маңыздылығын атап өтті. 

Сонымен қатар, тараптар қарашада Бішкекте өтетін Ұйымның XI Саммитіне дайындық мәселелерін де пысықтады. Онда Түркі әлемінің бірлігін күшейте түсуге бағытталған Бішкек декларациясы мен өзге де маңызды құжаттар қабылданбақ. Айта кетейік, еліміз ұйымның төрағасы ретінде 80-нен астам іс-шара өткізді. Солардың бірі көпшіліктің ықыласына бөленген V Дүниежүзілік көшпенділер ойындары. 

Өздеріңіз білесіздер Қазақстан бұл ұйымның құрушы елі. Қазақстан бастамасымен құрылған болатын түркі мемлекеттері ұйымы. Біз Ыстамбұлдағы хатшылықта осы түркі әлемін жандандыру тұрғысынан жұмыс істеп жатырмыз. Биыл біздің 15 жылдығымыз аталып өтіледі. Соған да қарқынды жұмыстар жүргізіліп жатыр. Осы түркі бірлік күніне орайластырылған Анкарада үлкен іс шарамыз жоспарланып отыр, - деді Түркі мемлекеттері ұйымы Бас хатшысының орынбасары Мерей Мұқажан.