Терроризм: Қазақстанның саясаты БҰҰ конгресінде талқыланды

Нұр-Сұлтан, BAQ.KZ. Біріккен Ұлттар Ұйымының Қылмыстың алдын алу және қылмыстық сот төрелігі жөніндегі 14-ші Конгресі (Киото, Жапония) аясында БҰҰ Есірткі және қылмыс басқармасының (ЕҚБ) ұйымдастыруымен терроризм және экстремизмнен зардап шеккен балалардың ахуалы тақырыбындағы арнайы іс-шара өтті. 

Бұл сессияға Қазақстан Сыртқы істер министрлігінің Ерекше тапсырмалар жөніндегі елшісі Талғат Қалиев қатысты.

Отандық сыртқы саяси ведомствоның өкілі еліміздің «Жусан» және «Русафа» гуманитарлық операциялары шеңберінде балаларды Сирия және Ирактан елге қайтару тәжірибесін баяндап берді. Кезекті операцияның қорытындысы бойынша үстіміздегі жылғы ақпан айының басында тағы 7 бала Отанға оралғаны белгілі.

Қазіргі таңда еліміздің мемлекеттік органдары әрбір бала үшін жеке-жеке әзірленген психологиялық және білім алу бағдарламалары шеңберінде кешенді көмек көрсетуді жалғастырып отыр, – деп мәлімдеді Қалиев. 

Осыған орай БҰҰ ЕҚБ және басқа халықаралық серіктестерімізге қазақстандық балаларды оңалту және қайта бейімдеу саласында көрсетіп отырған жәрдемі үшін ризашылық, сондай-ақ одан әрі бұл саладағы тәжірибемен алмасуға дайындық білдірілді.

БҰҰ ЕҚБ өкілдері Қазақстан Таяу Шығыстағы әскери қақтығыс аймақтарында қалып қалған балаларды қайтару және реинтеграциялау ісінде әлемдегі көшбасшылардың қатарында екенін атап өтті. 

Сонымен қатар, іс-шара барысында кәмелетке толмағандарды террористік және экстермистік іс-әрекетке тартудың алдын алу және оған қарсы тұруға бағытталған Еуропалық одақ, Жапония, Индонезия, Ирак және Нигерияның бастамалары талқыланды.