Терезеден секіруге дейін барды. Депутат жер сілкінісіне дайындықты тексеруді ұсынды

Мәжіліс депутаты Бақытжан Базарбек Төтенше жағдайлар министрлігі мен басқа да тиісті мекемелердің зілзаладан қорғану жұмыстарын қайта қарауды ұсынды, деп хабарлайды BAQ.KZ тілшісі.

Зіл-зала – айтып келмейтін апат. Сондықтан біздің ел зіл-зала апатына дайын ба?! Біле білсеңіздер, бұл - адам шығынына әкелетін қауіп-қатер. Сол себепті оған әркез сақадай сай дайын болған жөн. Бұған бүгін Алматыда болған жер сілкінісі куә, - деді депутат.

Базарбек атап өткендей, алматылықтар болуы мүмкін жер сілкінісі туралы хабарлама алмады.

Тұрғындар басында әбігерге түсті. Бойын үрей билеген халық жапатармағай сыртқа ұмтылды. Тіпті көпқабатты үйлердің терезесінен секіруге дейін барды. Көліктерімен қала сыртына шығып кетпек болғандарда есеп жоқ. Оның соңы ұзынсонар кептеліске ұласты. Бұл – еліміздің ең үлкен қаласы, жан-жақты дамыған, инфрақұрылымы мықты Алматыдағы жағдай. Абырой болғанда, ғимараттар құламады, адам шығыны жоқ. Десе де, мұндай жағдайдың қайталанбасына кім кепіл?! - деп айтты мәжілісмен.

Оның сөзінше, еліміздің таулы аймақтарында, жерасты қазынаны өндіріп жатқан өндірісті өңірлерде зілзала қаупі жоғары.

Сондықтан Төтенше жағдайлар министрлігі мен басқа да тиісті мекемелердің зілзаладан қорғану бойынша жұмыстарын мұқият қайта қараған жөн. Сонымен бірге тұрғындар арасында да зілзаладан қорғану шаралары бойынша оқу, жаттығу жұмыстарын жүйелі түрде жүргізіп отыру керек. Фейк ақпараттарға сенгіш халықты қорқыныш биледі. Барлық жағдай да өтірік ақпарат тез тарап кететіні бар. Азаматтар тек ресми ақпаратты ала білуі қажет, әрбір тараған материалды жан-жақты тексеруіміз керек. Сол үшін, бізде апатқа дайын болатындай мәдениет қалыптасуы тиіс, - деп айтты Бақытжан Базарбек.