Жамбыл облысында Өтеген батырдың 320 жылдығы атап өтілді

Нұр-Сұлтан, BAQ.KZ. Жамбыл облысы Қордай ауданында Өтеген  батырдың 320 жылдығы тойланды.              

Аудан орталығындағы Өтеген  батыр  ескерткішінің алдына халық  көп жиылды. Қордайлықтар ғана емес, алыс-жақын қалалардан, аудандардан келген қонақтар  қаншама. Ескерткіш  алдына  гүл  шоқтарын  қою рәсімінен  кейін,  барша жұрт іргедегі  «Өтеген  батыр» атындағы  аудандық  мәдениет  үйіне бет алды. Оның  кіреберісінде батырдың  Абылай  ханнан әкелген әйгілі  шұбар  тегенесі  қойылған.  

Оның айтуынша, батырдың ерлігі аңызға айналып, Күсеп, Майкөт, Сүйінбай, Сарбас, Жамбыл, Әлмейін, Тілеміс секілді ақын-жыраулардың  жыр-дастандарына арқау  болған.  Ел аузында Өтегенді батырлығымен қоса жиһангер, көріпкел әулие  ретінде танытатын аңыздар да сақталған. Батыр жетпіс  төрт жасында  Іле бойында өмірден өткен. Қапшағай су  қоймасы  салынуына  байланысты  ұрпақтары 1973  жылы сүйегін  Қордай жеріне әкеліп қайта  жерлеген. 1999 жылы Өтеген  батырдың 300 жылдығы республикалық  деңгейде атап өтіліп, басына кесене  тұрғызылды,  аудан  орталығында ескерткіші  орнатылды, елді мекенге, көшелерге есімі берілген. Сондай-ақ,  Алматы  қаласының  орталық  көшелерінің  біріне, Іле  ауданының  орталығы Энергетический кентіне Өтеген  батыр есімі  берілді. Өткен  жылы осы  елді  мекенде батырдың үлкен ескерткіші  орнатылды. 


Жиында  сондай-ақ, Қазақстанның  еңбек  сіңірген  дәрігері, белгіл меценат Мүсілім Дайырбеков, Алматы  облысынан  қонақтарды  бастап келген Іле  ауданы  әкімінің орынбасары Алмасбек  Сәтібаев, Іле ауданы  ардагерлер  кеңесінің төрағасы Әмзе Әлдібекұлы, Тараз  қаласы әкімінің орынбасары Кенжебек  Олжабай  және  басқалары сөз алып, батырлық пен  елдікті әспеттеудің  жас ұрпаққа патриоттық  тәрбие  берудегі  маңыздылығын атап көрсетті. «Мүйізді  Өтегеннің  мүйізді  ұрпақтары» кітабының  тұсаукесері  өтті. Сахна  төрінде қордайлық  жезтаңдай әнші Қарлығаш  Қожағазина, Алматы  облысы Іле ауданының әжелер  ансамблі Өтеген  батыр рухына арналған  әндерін тарту етті.



Бұдан басқа, ауыл  мешіті  маңындағы алаңқайда  орнатылған ашық сахна мен күрес  кілемінде палуандарымыз өзара күш сынасты. Бас  жүлдеге  су  жаңа автокөлік  тігілген туйе палуан күресіне еліміздің әр шалғайынан атан  жілік, бура санды  28  палуан келіпті. Өзара белдесулерден кейін ақтық  сынға  төртеуі  шықты. Үшінші орын үшін болған күресте 2016 жылы «Қазақ барысының» қола жүлдегері тараздық  Айбол Айтбек өткен  жылы «Алматы барысы» атанған Дәурен Нұралиновтан  басым  түсті. Ал, бас жүлдеге таласта  біздің  облысымыздың  палуаны, дзюдодан  Қазақстан  құрамасының мүшесі  Жақып  Дәулетханның  жұлдызы жанды.  Ол осыдан екі  жыл бұрын «Әскер барысы» және «Қазақстан  барысы» атанған  қызылордалық Еламан  Ерғалиевті  қапыда қалдырып, «Лада Гранта»   темір  тұлпарын тізгіндеді. 
  
            
Ал, отыз үш  шақырымдық  аламан  бәйгеде  Алматы облысы Қарасай  ауданынан Әлнұр Назарбаевтың атақты  жүйрігі «Үшқоңыр» алдына  ат салмай  келіп, иесіне «Тойота Хайлюкс»  көлігін  мінгізді. Екінші  келген  «Ақмоншақ» атты сәйгүліктің иесі  «Нива» автокөлігін олжалады. Сондай-ақ, топ бәйге мен  құнан  жарыста аты озып келгендер де темір  көлікті  болды.