Таза Қазақстан. Аралда 3000 түп ағаш отырғызу жоспарланып отыр

Аралдықтар да көркейту-көгалдандыру апталығында белсенділік танытып жатыр, деп хабарлайды BAQ.KZ.

«Таза Қазақстан» республикалық акциясының «Жасыл аймақ» апталығы аясында аудан көлемінде ағаш көшеттері мен гүл отырғызу жұмыстары жүргізілді.

Аталған жұмыстарға мекеме қызметкерлері, ардагерлер мен ерікті жастар атсалысты.

Биылғы маусымда Арал қаласында 3000 түп ағаш отырғызу жоспарланған. Жергілікті жерге төзімді көшеттер таңдап алынды. Аяқ су мәселесі қиындық тудырмас үшін тамшылатып суару әдісі қолданылып отыр. Бұдан бөлек, орталық көшелерге, демалыс орындарына, саябақтарға гүлдер отырғызылып жатыр. Бүгінгі акцияда қаламызға 70 түп ағаш, 100 түп гүл көшеттері отырғызылды.

Сонымен қатар акция аясында Арал теңізінің құрғаған ұлтанына сексеуіл егу жұмыстары да жүргізілді. Мемлекет басшысының тапсырмасымен Арал теңізінің құрғаған ұлтанына 1,1 млн гектар сексеуіл екпелерін егу кезең-кезеңімен жүзеге асырылып жатыр.

Атап өтейік, осы аптадан бастап «Таза Қазақстан» экологиялық науқанының «Жасыл аймақ» апталығы бастау алды. Тазалық және көркейту-көгалдандыру жұмыстары жүргізілетін болады.