Тағы бір өңірдің ардагерлері 5 млн теңгеден алатын болды

Ақмола облысының ардагерлері Жеңістің 80 жылдығына орай 5 млн теңгеден төлем алатын болды, деп хабарлайды BAQ.KZ тілшісі.

Ақмола облысының жұмыспен қамтуды және әлеуметтік бағдарламалар үйлестіру басқармасы 9 мамыр Екінші дүниежүзілік соғысы ардагерлеріне, жеңілдіктері бойынша ардагерлерге теңестірілгендерге Жеңістің 80 жылдығы қарсаңында қанлай әлеуметтік көмек көрсетінін мәлімдеді.

Биыл Ұлы Отан соғысындағы Жеңістің 80 жылдығы. Бүгінде облыста 5 ардагер тұрады. Олар Көкшетау, Қосшы қаласында, Бұланды, Бурабай, Жақсы аудандарында. Ережеге сәйкес төлем мөлшері 1,5 млн теңге. Дегенмен облыс әкімінің тапсырмасы бойынша Жеңістің 80 жылдығына орай бұл сома 5 млн теңгеге дейін ұлғайтылды, - деп жауап берді басқарма басшысының орынбасары Ерлан Мұхамедин ресми сауалымызға.

Екінші дүниежүзілік соғысының ардагерлеріне теңестірілген ардагерлер 25-тен 30 АЕК-ке дейін, яғни 98 300-117 960 теңге көлемінде төлем алады.

Олар:

▪️ Ленинградтағы блокада кезеңінде жұмыс істеген азаматтар;

▪️ кәмелетке толмаған концлагерь тұтқындары;

▪️ жараланғандықтан мүгедектік алған әскери қызметшілер;

▪️ азаматтық немесе әскери мақсаттағы объектілердегі радиациялық апаттар мен авариялар, ядролық сынақтар салдарынан мүгедектігі белгіленген адамдар және олардың мүгедектігі ата-анасының біреуінің радиациялық сәулеленуімен генетикалық байланысты балалары;

▪️ ЧАЭС қатысушылары мен мүгедектері.

Еске сала кетсек, 2025 жылғы 1 қаңтардағы жағдай бойынша Қазақстанда 85 203 ардагер тұрады. Олардың ішінде 1941-1945 жылдардағы соғысқа қатысқан ардагерлердің саны 120 адам.