Тағы бір альпинист ауруханада көз жұмды

12 қазанында Астанада төрт альпинист биіктіктен құлап кеткен болатын. Олардың бірі алған жарақаттарынан сол жерде көз жұмып, екінші ауруханада көз жұмды, деп хабарлайды BAQ.KZ.

Дәрігерлер 12 қазанында құрылыс алаңында биіктіктен құлап кеткен үш азамат қалалық көпсалалы ауруханаға жеткізілгенін айтты.

Үшеуіне де жұмсақ тіндердің көптеген жарақаты, қабырғалардың, жамбас сүйектерінің, жамбас сүйектерінің жабық сынықтары, ішкі ағзалардың көптеген жыртылуы, шок және жоғары дәрежелі травматикалық жағдай диагнозы қойылды, - делінген Астана қаласы Қоғамдық денсаулық сақтау департаментінің баспасөз қызметі таратқан хабарламада.

Сондай-ақ зардап шеккендер жансақтау бөлімдеріне жатқызылып, жарақаттарына хирургиялық ем жүргізілген.

Алған жарақаттарының салдарынан 1999 жылы туған азамат 12 қазан күні сағат 17:40-та көз жұмды, - деді Астана қаласы Қоғамдық денсаулық сақтау департаментінің баспасөз қызметі.

Бүгінгі күні, 2023 жылдың 13 қазанындағы жағдай бойынша тағы екі зардап шегуші (1999 және 2002 жылы туған) жансақтау бөлімінде жатыр.

Олардың жағдайы аса ауыр деп бағаланып отыр.

Елордалық тәртіп сақшылары құрылыс жұмыстарын жүргізу кезінде қауіпсіздік ережелерін бұзғаны үшін Қылмыстық кодексінің 277-бабы 3-бөлігі бойынша сотқа дейінгі тергеу басталғанын бұған дейін хабарлаған болатын.

«Алтын бесік» тұрғын үй кешенінің (Нұра ауданы) құрылыс алаңында 4 альпинистің құлау фактісі бойынша Астана қаласының Қалалық орта сапасы және бақылау басқармасы аталған апатты тексеру үшін комиссия құрды. Нәтижелері бойынша апаттың себептері мен жауапты тұлғалар анықталатын болады, - делінген Астана қаласы әкімдігі таратқан хабарламада.

Тергеу қорытындысы бойынша материалдар процессуалдық шешім қабылдау үшін Полиция департаментіне жолданады.

Сонымен қатар, аталған объектідегі барлық құрылыс-монтаж жұмыстары тоқтатылды.

Еске салсақ, Астанада бірнеше альпинист биіктіктен құлап кетіп, бір адам сол жерде көз жұмғанын жазған болатынбыз.